ХОТ ХООРОНДЫН ТЭЭВЭРЛЭЛТЭНД ЯВДАГ БҮХ ТӨРЛИЙН АВТОБУСНУУД СҮХБААТАРЫН ТАЛБАЙ РУУ ХӨДӨЛЛӨӨ

Авто тээврийн үндэсний төвөөс хот хоорондын тээвэрлэлтэнд явдаг бүх төрлийн автобуснууд яг одоо цуваагаар Сүхбаатарын талбай руу хөдлөх гэж байна. Өнөөдөр 10-14 цагийн хооронд Сүхбаатарын талбайд "Өвөлд бид бэлэн" нэгдсэн өдөрлөг болох бөгөөд "Автотээврийн менежментийг сайжруулах жил"-ийн хүрээнд хийсэн үйл ажиллагаа болон хийж хэрэгжүүлсэн ажлуудынхаа талаар мэдээлэл өгч, сурталчлах, өвөлжилтийн бэлтгэл ажлыг олон нийтэд нээлттэй танилцуулах юм.

Өдөрлөгт Зам, тээврийн хөгжлийн яам, "Автотээврийн үндэсний төв" ТӨҮГ болон улс, хот хоорондын зорчигч тээврийн үйлчилгээ эрхлэгч 22 аж ахуйн нэгж байгууллагын төлөөлөл оролцох аж.

Өдөрлөгийн үеэр:

Улс, хот хоорондын нийтийн зорчигч болон ачаа тээвэр, шуудан, жуулчин тээвэрлэлтийн үйлчилгээний талаар мэдээллэх, зөвлөгөө өгөх

• Техникийн хяналтын үзлэг оношлогооны талаар зөвлөгөө, зааварчилгаа өгөх

• Улс, хот хоорондын ачаа, зорчигч тээвэрлэж байгаа тээврийн хэрэгслийн байршил тогтоох /GPS/, шуурхай зохицуулалтаар хангах, аюулгүй тээвэрлэлтийн үйл ажиллагааны талаар мэдээлэл өгөх, танилцуулах

• Тээвэрлэлтийн гэрээгүй тээврийн хэрэгслээр зорчихгүй байхыг анхааруулах, хууль бус тээвэрлэлтийн талаар мэдээ, мэдээлэл өгөх

• Тээврийн хэрэгслийн улсын дугаар олгох, шилжилт хөдөлгөөн импортын бүртгэл хийх

• Тээврийн хэрэгслийн лавлагаа олгох, хасалт хийх

• Тээврийн хэрэгслийн даатгал хийх

• Тээврийн хэрэгслийн татварын үйл ажиллагаа явуулах, мэдээлэл өгөх

• Мэргэшсэн жолоочийн шалгалт авах, лавлагаа өгөх

• Онлайн тасалбар борлуулалтын системийн танилцуулга хийх, мэдээлэл өгөх

• 1900-1234 лавлах үйлчилгээ ажиллах, Автотээврийн салбартай холбоотой мэдээ мэдээллийг өгөх

• Хот хоорондын зорчигч тээвэрлэлтэд явдаг автобусыг танилцуулах зэрэг автотээвэртэй холбоотой үйлчилгээ, мэдээ мэдээллийг нэг дороос цогцоор нь авах боломжтой юм.

Мөн тээвэрчид болон иргэдийн дунд хөгжилтэй тэмцээн зохион байгуулж азтан тодруулах үйл ажиллагааг зохион байгуулах аж.