“ГАН ДУУЛГА” КЛУБИЙН БАГ ТАМИРЧИД ХҮРЭЛ МЕДАЛЬ ХҮРТЛЭЭ

Баянхонгор аймгийн Онцгой байдлын газрын Гал түймэр унтраах, аврах 16-р анги байгуулагдсаны 40 жилийн ой, Онцгой байдлын асуудал эрхэлсэн байгууллагын Гал унтраах техникийн олон төрөлт спортын холбооны клубуудын аварга шалгаруулах хоёрдахь удаагийн тэмцээн Баянхонгор аймагт боллоо. Тэмцээнд Улаанбаатар бүсийн "Ган дуулга", Зүүн бүсийн "Шонхор", Төвийн бүсийн "Од", Хойд бүсийн "Алтангадас", Баруун бүсийн "Алтайн бүргэд" клубуудийн шигшээ баг болон урилгаар Монгол Улсын залуучуудын шигшээ баг, Хууль сахиулахын их сургууль, Гал түймэр унтраах, аврах 10 дугаар ангийн нийт 8 багийн 60 орчим тамирчин оролцож, довтолгооны шат, 4х100 м, саадтай 100 м-ийн гүйлт, байлдааны тархалт гэсэн дөрвөн төрөлд аваргуудаа шалгаруулсан юм.

Тус тэмцээнд нийслэлийн Онцгой байдлын газраас оролцсон баг тамирчдаас 4х100 метрийн төрөлд Гал түймэр унтраах, аврах 10 дугаар ангийн баг тамирчид гуравдугаар байр, саадтай 100 метрийн төрөлд Улаанбаатар бүсийн "Ган дуулга" клубийн тамирчин, дэд мастер Э.Алтаншагай нэгдүгээр байранд, "Ган дуулга" клубийн тамирчин, 1-р зэрэгтэй Б.Буянбат гуравдугаар байранд тус тус шалгарсан байна.

Гал унтраах техникийн олон төрөлт тэмцээний клубуудын аварга шалгаруулах хоёрдахь удаагийн тэмцээний нийлбэр дүнгээр нэгдүгээр байранд Хойд бүсийн "Алтангадас" клуб, хоёрдугаар байранд Зүүн бүсийн "Шонхор" клуб, гуравдугаар байранд Улаанбаатар бүсийн "Ган дуулга" клубийн баг тамирчид шалгарлаа гэж нийслэлийн Онцгой байдлын газраас мэдээллээ.