ДЭЛХИЙН ХАМГИЙН ӨНДӨР ЦАЛИНТАЙ ХОККЕЙЧИН ЭХНИЙ ТОГЛОЛТДОО ХЕТ-ТРИК ХИЙЛЭЭ

NHL буюу Үндэсний Хоккейн Лигийн 2017/18 оны улирлын эхний тоглолтууд боллоо. Өнгөрсөн улиралд Улирлын хамгийн үнэ цэнэтэй тоглогчийн "Харт Трофи" шагналыг хүртсэн "Эдмонтон Ойлерз"-ийн 20 настай канад довтлогч Коннор Макдэвид шинэ улирлын эхний тоглолтдоо "Калгари Флеймс"-ийн хаалганд хет-трик хийж, баг нь 3:0-ээр ялалт байгууллаа.

Коннор Макдэвид энэхүү үзүүлэлтээрээ улирлын эхний тоглолтод хет-трик хийсэн "Эдмонтон Ойлерз"-ийн түүхэнд анхны хоккейчин болж бичигдлээ. Өнгөрсөн зун тэрбээр "Ойлерз"-той найман жилийн 100 сая ам.долларын гэрээ байгуулснаар дэлхийн хамгийн өндөр цалинтай хоккейчин болсон юм.

Улирлын эхний тоглолтод өмнөх улирлын аварга "Питтсбург Пингвинз"-ийнхэн "Сент Луис"-т нэмэлт үед 4:5-аар хожигдсон байна.

М.Болджин