45 НАСТАЙ ЯРОМИР ЯГР "КАЛГАРИ"-Д ТОГЛОХООР БОЛЛОО

Чехийн хоккейн домог, 45 настай Яромир Ягр NHL-д үргэлжлүүлэн тоглохоор шийджээ. Тэрбээр "Калгари Флеймс"-тэй нэг жилийн нэг сая ам.долларын цалинтай гэрээнд гарын үсэг зурсан байна. Үүнээс гадна нэмэлт урамшуулал хүртэх юм.

NHL-ийн түүхэн дээд амжилт болох Горди Хоугийн амжилтыг давахад Ягрт 57 тоглолт дутуу. Ягр NHL-д нийтдээ 1914 тоглолтод гарч, 765 гоол оруулж, 1149 гоолын дамжуулалт өгсөн юм.

Өнгөрсөн улиралд тэрбээр "Флорида"-гийн төлөө тоглохдоо 16 гоол оруулж, 30 гоолын дамжуулалт өгсөн.

"Хоёрдмол сэтгэгдэл төрж байна. Нэг талдаа би энэ мөчийг их хүлээсэн. Нөгөө талдаа яриа хэлэлцээр их сунжирч байж бүтлээ. Сайн мэдэхгүй шинэ багт ирээд шууд талбайд гарах нэг их олзуурхууштай зүйл биш. Тэгээд ч сүүлийн таван сард бэлтгэл хийгээгүй болохоор сайн тоглоно гэж бодохгүй байна. Улирлын эхний тоглолтод оролцохгүй нь бол ойлгомжтой. Одоо л багтаа нэгдэж байна шүү дээ.

"Сент Луис" болон "Калгари"-гийн санал бараг адил байлаа. Гэхдээ "Калгари" намайг бүр эхнээсээ авахыг хүссэн юм. Харин "Сент Луис" бол тоглогчид нь гэмтээд ирэх үед надад хандсан. Тэд намайг гэмтсэн залуусынхаа нөхөөс гэж харсан.

Цалингийн тухайд бол миний насны тамирчинд хэн л үүнээс илүү амлаа гэж дээ. Нөгөө талаас нь харвал бас дарамт багасч байгаа юм. Ийм цалинтай, ийм насны тамирчнаас хэн ч улирлын 50-60 тоглолтод гарахыг шаардахгүй.

Канадын багт тоглох болсон минь содон байна. Өмнө нь ийм боломж байсангүй. Энэ улирал миний хувьд хамгийн сүүлчийнх гэдэг нь 99.9 хувийн магадлалтай. Тиймээс би хожим ядаж ганц ч гэсэн улирал Канадад тоглосон юм даа гэж ярих болно" хэмээн Яромир Ягр өгүүлсэн байна.

NHL-ийн шинэ улирал маргааш эхэлнэ.

М.Болджин