ЛАС-ВЕГАСЫН БУУЧИЙН ЭМЭГТЭЙ: ТЭР ДУУ МУУТАЙ, ИХ ДОТОГШООГОО ХҮН БАЙСАН...

АНУ-ын Невада мужийн Лас-Вегас хотын Mandalay Bay зочид буудлын 12 давхраас задгай талбайд цугласан олон нийт рүү есөн минутын турш галлаж, 59 хүний амийг хөнөөж, 527 хүнийг шархтуулсан 64 настай Стивен Пэддокийн зэр зэвсгүүдийн гэрэл зургийг хэвлэлээр дэлгэлээ.

Хижээл насны саятан эр яагаад ийм аллага үйлдэх болсон нь одоогоор тодорхойгүй хэвээр байна. Тэрбээр аллага үйлдэхээсээ өмнөхөн казино тоглож, мөн найз эмэгтэй Мэрил Дэнли рүүгээ 100 мянган ам.долларыг Филиппин рүү шилжүүлсэн нь тогтоогдсон байна. Мэрил Дэнлиг Филиппинд түр саатуулж, ойрын хугацаанд АНУ-д аваачин мэдүүлэг авч, байцаах ажээ.

Стивен Пэддок есдүгээр сарын 28-нд Mandalay Bay-д буудаллаж, үүнээс хойш хоёр хоногийн хугацаанд 10 чемодантай 19 галт зэвсэг, тэсэрч дэлбэрэх төхөөрөмж оруулсан ч буудлын ажилтнууд огт анзааралгүй өнгөрчээ. Мөн тэрбээр өрөөнийнхөө бараг өнцөг булан бүрт камер байрлуулсан байжээ.

The Washington Post-ийн сэтгүүлчид Стивен Пэддок яагаад ийм аймшигтай аллага сэдснийг ойлгохгүй байгаа мэдэгдсэн байна.

"Алуурчид ихэвчлэн хэрцгий догшин, төлөвшөөгүй залуус байдаг. Гэтэл Пэддок саятан, 64 настай. Түүний энэ үйлдлийг дэлхий дээр гэнэт сүүлт од унасантай л зүйрлэж болохоор. Түүнд ингэх ямар шалтаг, шалтгаан байсан юм бол? Улс төрийн ямар нэгэн нам, бүлэглэлд хамааралгүй. Улс төр гэж хэнхдэг цээжээ дэлддэггүй, өөрийнхөөрөө сайхан амьдарч явсан эр. Мөн шашин шүтлэгийн ямар нэгэн хамааралгүй байсан юм билээ.

Сүүлийн хэдэн жилд тэтгэвэртээ сууж, амар амгалан амьдарсан. Түүнд олны анхаарлыг татах зүйл огт байхгүй. Кантри хөгжимд дуртай, концерт байнга үздэг. Тэр кантри хөгжимчний тоглолтын үеэр гал нээсэн шүү дээ. Хөрөнгийн хэмжээ нь 2 сая гаруй ам.доллар. Үл хөдлөх хөрөнгийн менежер, ня-богоор ажиллаж байсан. Тэтгэвэртээ суугаад мөрийтэй тоглоомд шимтсэн. Хувьдаа хоёр жижиг онгоцтой, нисэгчийн үнэмлэхтэй байж.

Түүний хөрш 79 настай Дайана Маккей болон түүний найз эмэгтэй Мэрил Дэнлигийн ярьснаар бол "Жаахан хачин эр байсан. Их дуугүй, дотогшоогоо маягийн. Түүнтэй байхад ганцаараа л байгаа юм шиг санагдмаар, их нам гүм хүн" байсан гэнэ.

Стивен Пэддок олон хүний амийг буудан хөнөөснийхөө дараагаар цагдаа нарыг ирэхээс өмнө өөрийнхөө амийг егүүтгэсэн юм.

М.Болджин