С.МИШИГ: С.ОДОНТУЯА ДАРГА БИДНИЙГ ОЛОН НИЙТЭД БУРУУ ОЙЛГУУЛЖ БАЙНА

Өөрсдийн хүчээр ажлын байр бий болгоё, хог хаядаг газраа л өгчих хэмээн хавраас хойш БГД-ийн Засаг даргын тамгын газрын босгыг элээж байгаа худалдаачид өлсгөлөн зарлаад 96 цаг боллоо. Энэ хугацаанд тэднийг хэн анхаарав, хэн тэдний төлөө сэтгэлээ чилээв. Монголын худалдаачдын холбоо, Баянгол дүүргийн ИТХ-ын зарим төлөөлөгчид, Хүний эрхийн үндэсний комиссын дарга өлсгөлөн зарлаад байгаа иргэд дээрээ очсон байна. ХЭҮК-ийн дарга Ж.Бямбадорж тухайн иргэддэй уулзаж, эрхийг нь хамгаалах талаар ажиллана гэдгээ хэлж, сүрдүүлсэн хүмүүсийг нь олох талаар холбогдох газруудад хэлж, яриа хэлэлцээр хийх тухай амлаад буцсан байна.

Өлсгөлөн зарлаад байгаа худалдаачин С.Мишиг дээрх хүмүүсийг уулзсан тухай ярьж, УИХ-ын гишүүн С.Жавхлан бас ирж яваа гэсэн хэмээгээд. "Ер нь олон нийтэд бидний тухай мэдээлэл их буруу хүрч байгаа юм билээ. БГД-ийн засаг дарга С.Одонтуяа биднийг ил задгай худалдаа хийхийн төлөө өлсгөлөн зарлаж байгаа мэтээр хүмүүст ойлгуулж, буруу мэдээллийг холбогдох байгууллагад нь өгч байгааг иргэдийн төлөөлөгч, ХЭҮК-ийн даргатай уулзаж байж мэдлээ. Олон нийтийн сүлжээ. Зарим нэг хэвлэл мэдээллийн байгууллагаар ч гэсэн биднийг их буруу ойлгуулж байна. Үнэндээ бид тэр хогонд дарагдсан газраа л өгчих. бид өөрсдөө байр бариад ядарсан хэдэн худалдаачдаа оруулаад гудамж талбайд биш, дотор худалдаа хийе гэж яриад байгаа шүү дээ. Биеийн байдал сайнгүй байна. Манай нэг хүн сульдаад эмнэлэгт хүргэгдсэн. Одоо бид 11-үүлээ байна" гэж ярьсан юм.