АЛУУРЧИН-АЛИАЛАГЧИЙГ 27 ЖИЛИЙН ДАРАА ИЛРҮҮЛЖ, БАРИВЧИЛЖЭЭ

АНУ-ын Флорида мужийн Велингтон хотноо 1990 онд буюу эдүгээгээс 27 жилийн өмнө Марлин Уоррен гэх эмэгтэйг алиалагчийн багтай этгээд буудан хөнөөсөн хэрэг гарсан ч өдийг хүртэл алуурчинг илрүүлээгүй байсан ажээ.

Марлин Уорренийг хаалганыхаа шагайвчаар харахад өмнө нь цагаан царай, улаан хамар, шар үстэй алиалагчийн багтай этгээд нэг гартаа баглаа цэцэг, нөгөө гартаа бөмбөлөг атган зогсож байсан гэдэг. Ингээд хаалгаа онгойлготол өөдөөс нь буудчихаад машинд суун зугтаж зайлжээ. Марлин Уоррен хоёр хоногийн дараагаар шархаа дийлэлгүй амьсгал хураасан байна.

Тухайн үед цагдаа нар Марлины нөхөр Майкл Уоррен бол түүний нууц амраг Шил Кинийг хэрэгт сэжиглэн баривчилж, байцаалт авч байжээ. Шил Кин аллага гарахаас хоёр хоногийн өмнө тус хотын нэгэн дэлгүүрээс шаргал үс, нүүрний баг худалдан авсан нь тогтоогдож, улмаар аллагаас 90 минутын өмнө бөмбөлөг болон баглаа цэцэг дэлгүүрээс авсан нь мөн тогтоогдож байжээ. Гэлээ ч цагдаа нар Шил Кинийг тус аллагыг үйлдсэн гэдгийг хөдөлбөргүй баримтаар нотолж чадаагүй тул хоёр жилийн дараагаар хэргийг хаасан аж.

Гэлээ ч 2014 онд хэргийг дахин хянан шалгахаар болж, гэрчүүдийг дахин байцаахад Майкл Уоррен Шил Кинтэй гэрлэж, Теннесси мужид хамтдаа ресторан нээн ажиллуулсан нь тодорхой болсон гэнэ. Энэ удаад цагдаа нар хэргийн газар дээрээс олдсон эд мөрийн баримтыг ДНК-аар нарийвчлан шалгаж үзэхэд Шил Кинийх болох нь тогтоогджээ. Ийнхүү бүтэн 27 жилийн дараагаар алуурчин-алиалагч илчлэгдэж, баривчлагдсан байна.

М.Болджин