ИНГЛАК ЧИНАВАТ ДУБАЙД НУУГДАХ БОЛЖЭЭ

Тайландын Ерөнхий сайд асан Инглак Чинават эх орноосоо оргон зайлж, Арабын Нэгдсэн Эмират Улсын Дубай хотноо нуугдаж байгаа гэнэ. Энэ талаар Тайландын Ерөнхий сайд Прают Чан-Оча мэдэгдсэн байна.

"Түүнийг Дубайд нуугдаж буй талаархи албан бус мэдээллийг би Гадаадын хэргийн яамнаас сонслоо" хэмээн Прают Чан-Оча өгүүлжээ.

Инглак Чинават наймдугаар сарын 25-нд шүүх хуралд очих ёстой байсан ч биеийн эрүүл мэндийн шалтгааны улмаас очоогүй тул түүнийг баривчлахыг шүүхээс хүлээн зөвшөөрсөн юм. Гэлээ ч баривчлахаар очиход Инглак Чинават аль хэдийнэ эх орноосоо оргон зайлсан нь тодорхой болсон. Инглак Чинаватыг эрх мэдлээ хэтрүүлэн хэрэглэж, улс төсвийн мөнгийг ихээр шамшигдуулсан хэрэгт буруутган, шүүхээс таван жилийн ял оноосон юм.

Тайланд болон АНЭУ нь хоорондоо хэрэгтэн шилжүүлэх тохиролцоогүй тул Инглак Чинават Дубайд нуугдахад аюулгүй бололтой. Гэлээ ч Тайландын төр засгаас Интерполын ажиллагааг дэмждэг 190 улсаас Инглак Чинаватын байгаа газрыг тодорхой мэдэгдэхийг хүссэн хүсэл гаргажээ.

Reuters-ийн мэдээлснээр бол Инглак Чинаватын ах, Тайландын Ерөнхий сайд асан тэрбумтан Таксин Чинават мөн Дубайд амьдардаг ажээ.

М.Болджин