С.МИШИГ: ШИНЖИЛГЭЭ ӨГСӨНИЙХӨӨ ДАРАА ШУУД ХУУРАЙ ӨЛСГӨЛӨН ЗАРЛАНА

Хотын өнгө үзэмжийг гутааж байгаа нь хүн үү? эсвэл овоорсон энэ хог уу?...гэдгийг Нийслэлийн Баянгол дүүргийн Засаг даргын тамгын газар болон түүнийг толгойлж буй С.Одонтуяа даргаас асуумаар санагдана.

Амьдралаа залгуулж, хоолоо олж идэх гэсэн иргэд нь ажлын байр, ажиллах нөхцөл бололцоогоор хомс учраас ийнхүү гадна талбайд бараа бүтээгдэхүүнээ арай хямд өртгөөр зарж буй. Тэд өндөр түрээс төлж, түрээсийнхээ мөнгийг төлөхийн тулд бараа бүтээгдэхүүн дээрээ үнэ нэмэхээс илүүтэй, арай хямдаар хэрэглэгчдэд хүргэхийг зорьж байна. Үнэхээр хотын өнгө үзэмжинд муугаар нөлөөлөөд байгаа бол хогоор дүүрч, бохирдсон энэ талбайгаа бидэнд өгчих, бид хамтын хүчээр худалдааны төв бариад ажлын байртай үлдэе гэх саналыг дүүргийнхээ засаг даргад удаа дараа тавьж байгаа аж.

Гэвч тэдний энэ үгийг юман чинээ үнэндээ бодсонгүй. Нийслэлийн удирдлагууд хотын өнгө үзэмжинд их анхаардаг болжээ. Улсынх нь нийслэл юм чинь аргагүй биз. Гэхдээ иргэн хүн байхгүй бол Монгол Улс гэж тусгаар улс байх уу? Тусгаар улс байж чадахгүй бол Улаанбаатар гэж нийслэл байх байсан уу? гэдгийг асуумаар санагдана.

Ямартай ч ажлын байрны төлөө, өөрсдийнх нь дуу хоолой, үзэл бодлыг сонсооч, бидэнтэй уулзаач хэмээн худалдаачид өлгөлөн зарлаад хоёр хоёр хонолоо. Худалдаачдыг нойтон өлсгөлөн эхлүүлээд 24 цаг болчихоод байхад нэг ч эрүүл мэндийн байгууллага ирж үзсэнгүй хэмээн өчигдөр мэдээллэж байсан билээ.

Тэгвэл өчигдөр үдээс хойш 16 цагийн үед БГД-ийн эрүүл мэндийн нэгдлээс эмч нар очиж, өлсгөлөн зарлаж байгаа иргэдийн эрүүл мэндийг үзээд явсан байна. Өлсгөлөн зарлаж байгаа худалдаачин С.Мишигийн хэлж байгаагаар бол шинжилгээ өгчихөөд шууд хуурай өлсгөлөн зарлана гэж байсан юм.

Өлсгөлөн зарлаад байгаа иргэдийн хувьд дүүргийн засаг даргатайгаа уулзаж, нөхцөл байдлаа танилцуулж, тухайн газарт юу хийх гээд зориод байгаа, тэр нь ажилгүй, орлогогүй болох гээд байгаа 100-аад иргэний асуудлыг шийднэ гэдгийг хэлж, ойлгуулах хүсэлтэй байгаа юм билээ. Тэгэхээр дүүргийн засаг дарга асуудлыг анхааралдаа авч, иргэдийнхээ үгийг сонсох сэтгэл гаргавал өлсгөлөн зарлаад байгаа 12 иргэний эрүүл мэнд, амь нас аврагдах юм байна.

Б.Ирээдүй