​Г.БААСАН ДАРГЫГ АТГ РУУ ОРУУЛААГҮЙ ГЭХ СЕНСАЦИ ХААЛГА АНДУУРСАНААС ҮҮДЖЭЭ

АТГ газар Олон нийтийн зөвлөлийн дарга Г.Баасангаас айсан уу, эмээсэн үү дотогшоо нэвтрүүлэхгүй байна гэх мэдээлэл нэг хэсэг сошиал ертөнцөд цацагдсан билээ. Тэгвэл Г.Баасан даргыг нэвтрүүлээгүй биш харин буруу хаалгаар орох гэсэн учраас түүнд саад учирсан үйл явдал болсон аж. Энэ талаар АТГ-ын тамгын хэлтсийн дарга, эрхэлсэн комиссар З.Баасанням ийнхүү тайлбар хийжээ. Тэрбээр "Тэр өдөр авлига, мөнгө угаахтай тэмцэх чиглэлээр олон улсын хурал, сургалт болсон. Тэр өдөр мөн Ард түмний онц зөвлөл гэдэг байгууллага манай А байрны урд жагсаал хийсэн. Авлигатай тэмцэх газрын байр нь төрийн тусгай хамгаалалтад байна гээд хуулийн заалттай. Төрийн тусгай хамгаалалтын албан хаагчид А байрны нэвтрэх хөдөлгөөнийг хязгаарлахтай давхацсан байсан. Миний авсан мэдээллээр, Олон нийтийн зөвлөлийн гишүүд маань буруу хаалгаар нэвтрэх гээд очсон юм билээ. Та бүхэнд хэлэхэд, Авлигатай тэмцэх газар Олон нийтийн төвтэй болсон. А байрны буюу төв хаалгаар эрүүгийн байцаан шийтгэх ажиллагаанд холбоотой хүмүүс нэвтрэхээр дотоод журамтай. Харин Олон нийтийн төвийн хаалгаар бусад иргэд, олон нийтийг нэвтрүүлнэ. Энэ дээр Баасан даргыг оруулахгүй, нэвтрүүлэхгүй гэсэн асуудал байхгүй" хэмээсэн байна.

Н.Бат