​ХҮНИЙ АМЬ НАС, ЭРҮҮЛ МЭНД ТОГЛООМ БИШ ШҮҮ С.ОДОНТУЯА ДАРГА АА

Баянгол дүүргийн засаг дарга С.Одонтуяа өлсгөлөн зарлаад байгаа иргэдийг "үхвэл үхэг" гээд хаяад гадаад явчихлаа гэж үү. Дүүрэгт нь иргэд "үхсэн ч гомдолгүй" хэмээн гарын үсэг зураад засаг даргатайгаа уулзах хүсэлт тавиад нойтон өлсгөлөн зарлаад ойролцоогоор 30 цаг болж байна. Гэвч тэдгээр иргэдийг сонсож, тэдэнд санаа зовж байгаа хүн байна уу дээгүүр. Монгол Улсын нийгэм эдийн засгийн байдал хүнд байна. Ажилгүй, орлогогүй иргэдийн тоо өдрөөс өдөрт нэмэгдэж, өрнөөс өрний хооронд өл залган Монголын ард түмэн амьдарч байна. Өр зээлний асуудал ялангуяа худалдаа эрхлэгчдийн хувьд их эмзэг, тулгамдсан асуудал болчихоод байгаа юм.

Тэдний хувьд худалдаа эрхлэх нь өдрийн хоолоо олж, үр хүүхдээ тэжээх, сурч боловсрох нөхцлийг нь хангах эдийн засгийн эх үүсвэр нь гээд хэлчихэд дэгсдүүлсэн болохгүй биз. Худалдаачдын хувьд өдийг хүртэл төрөөс ямар нэгэн хайр, халамж гуйж, гараа тосон зүгээр суугаагүй юм. Тэд өөрсдийн нөөц бололцоогоо ашиглан гадагш дотогшоо явж, арилжаа наймаа хийдэг. Тэд төрийн ямар нэгэн бодлогоос гадуур өөрсдийн хүчээр өдийг хүртэл явсны эцэст мөнгө хүүлэгчдийн халаасанд орж, түүнээсээ болж сэтгэл зүйн хувьд хүнд дарамтанд амьдарч буй. Тэднийг "өр зээлээ хэрхэн төлнө дөө", "хүүхдийн сургуулийн хэрэгсэл, хоол унд, оюутны төлбөр" гэх мэт олон асуудал шаналгаж байхад төр дэмжих нь битгий хэл улам бүр дарамталж, хөөж тууж, торгож, хүн биш аятай л үзэх болжээ. Өлсгөлөн зарлаад байгаа худалдаачдын хувьд газрын асуудлыг л шийдээд өгвөл, өөрсдийн нөөц бололцоогоороо ажлын байраа бий болгоод худалдаа наймаа хийе гэх гарц гаргалгааг ярьж байгаа аж.

Хамгийн гол нь "Хар хорин" болон ойр хавьд нь үйл ажиллагаа явуулдаг аж ахуйн нэгжүүдийн хогийн цэг болгож, бохирдуулж, завааруулаад байгаа газрыг тэд аваад дээр нь объект бариад худалдааны жижиг төв байгуулаад, ил талбайд худалдаа хийгээд байгаа хүмүүсээ оруулъя гэдэг асуудлыг л дүүргийн засаг даргадаа тавиад байгаа юм билээ. Чухам яагаад БГД-ийн засаг дарга С.Одонтуяа өөрсдийн санаачлагаар ажлын байраа бий болгох гээд байгаа тэдгээр хүмүүсийг үл тоогоод байгаа нь ойлгомжгүй.

"Бидний амь нас С.Одонтуяа даргад үнэ цэнэгүй гэдэг нь харагдлаа"

Өлсгөлөн зарлаад байгаа худалдаа эрхлэгч С.Мишиг "Тогтмол ажилтай байдаг багш болон эмч нар ажил хаялт зарлах дээрээ тулж, цалин хөлсөө нэмүүлэх дээрээ тулж, хамгийн хатуу гэж хэлж болохоор шаардлагуудыг тавьж байна. Гэтэл улсаас нэг ч төгрөг гуйгаагүй, өөрөө өөрсдөдөө ажлын байр бий болгож, амьдралаа авч яваа иргэдээ шахаж хавчиж байгаа үйлдлийг хатуу эсэргүүцэж байна. Нийслэл, дүүрэг хоёрын дунд явсаар бид туйлдлаа. Өчигдөр биднийг өлсгөлөн зарлаж эхэлснээс хойш С.Одонтуяа дарга бидэнтэй уулзана гэж ярьсан. Гэвч цагийн дараа утас нь руминг үйлчилгээнд холбогдчихсон. Дүүрэг, нийслэлийн хооронд биднийг чулуу хөөлгөж байхаар бидэнтэй уулзаад, нөхцөл байдалтай минь танилцаач гэж л дүүргийн засаг даргаас хүсч байна. Гэвч уулзахгүйгээр гадагшаа явчихлаа. Дүүргийн эрүүл мэндийн нэгдэлд бид өчигдөр өлсгөлөн зарлаж байгаагаа мэдэгдэж хандсан. Гэвч 24 цаг болчихоод байхад нэг ч эмч ирж, биднийг үзээгүй байна. Одоо Эрүүл мэндийн яам руу хандах санаатай байна. Ямар ч байсан бидний амь нас төр засагт, дүүргийн эрүүл мэнд хариуцсан хүмүүст, С.Одонтуяа даргад үнэ цэнэгүй гэдэг нь харагдлаа.

-С.Одонтуяа даргыг гадагшаа явчихлаа гэж та яаж мэдэж байгаа юм бэ?

-БГД-ийн хуулийн хэлтсийн дарга нь ирж уулзсан. Бидэнтэй уулзаад дарга эзгүй байгаа мэдэгдэл өгнө гэсэн. Бид аваагүй. Төрийн хүн улс эх орныхоо, иргэнийхээ төлөө ажилладаг байх ёстой байх. Гэвч өнөөдөр иргэн хүний амь нас төрийн жолоо атгаж байгаа хүмүүст хэрэггүй болжээ. Харамсалтай байна. Дүүргийн иргэнээсээ зугтааж өрөөндөө нуугддаг С.Одонтуяагаар яаж бид дүүргээ удирдуулах юм бэ" гэлээ.

Н.Цэндбат