​ТЭНЭМЭЛ АМЬДРАЛТАЙ 12-15 НАСНЫ ХҮҮХДҮҮД БҮЛЭГЛЭН ХУЛГАЙ ХИЙЖЭЭ

Жолооч нар автомашиныхаа эд зүйл болон дотор нь байгаа эд зүйлийг хулгайд алдахаас урьдчилан сэргийлж, анхаарал болгоомжтой байхыг цагдаагийн байгууллагаас анхааруулж байна. Сүүлийн жилүүдэд цагдаагийн байгууллагад бүртгэгдэж байгаа хулгайн хэргийн дийлэнх хувь нь автомашинаас эд зүйлээ алдсан, автомашины толь хулгайд алдсан гэх дуудлага мэдээлэл байгаа юм.

Өнгөрөгч хоногуудад цагдаагийн байгууллагад автомашинтай холбоотой хулгайн хэрэг бүртгэгдсэн бөгөөд хэргийг 12-15 насны тэнэмэл амьдралтай хүүхдүүд үйлдэж байгаа нь анхаарал татаад байна.

Тодруулбал, Чингэлтэй дүүргийн 1-р хороонд байрны гадна байсан автомашинд энэ сарын 23-ны 22:00-01:00 цагийн хооронд хулгай орсон байна" гэх мэдээлэл 9 дүгээр сарын 24-ны өдөр цагдаагийн байгууллагад ирсэн байна. Мэдээллийн дагуу шуурхай эрэн сурвалжилж уг хэргийг оршин суух тодорхой хаяггүй тэнэмэл амьдралтай 13 настай эрэгтэй Т, 14 настай эрэгтэй Г, 14 настай эрэгтэй Т нар бүлэглэн үйлдэж, монетон гинж, 80 мянган төгрөг зэрэг эд зүйлс хулгайлсаныг илрүүлэн шалгаж байгаа юм.

Мөн "Баянгол дүүргийн 13-р хорооны байрны гадна байсан автомашинд хулгай орсон мэдээлэл" цагдаагийн байгууллагад ирсэн байна. Мэдээдллийн дагуу шалгахад , СХД-ийн 13-р хороонд оршин суух Т, БГД-ийн 13-р хороонд оршин суух Н, Дархан сумын харъяат О, БГД-ийн 13-р хороонд оршин суух С нарын нийт 11 автомашины шилийг хагалж, хулгай хийж байсныг үйлдэл дээр нь илрүүлэн шалгаж байна. Хэргийг оршин суух хаяг тодорхойгүй тэнэмэл амьдралтай 14 настай эрэгтэй Г, 15 настай Т нар үйлджээ.

Баянзүрх дүүргийн 1-р хороонд мөн л байрны гадна автомашинд хулгайч байна гэх дуудлага цагдаагийн байгууллагад ирсэн байна. Дуудлагын дагуу хэргийн газарт ажиллахад тус хорооны оршин суугч З-ийн "Toyota Prius-20" автомашины шилийг, тодорхой оршин суух хаяггүй /тэнэмэл/ амьдралтай Г /эр.12н/ хагалж эд зүйл хулгайлж байсныг үйлдэл дээр нь илрүүлэн, шалгаж байна.

Гэмт этгээдүүд шилийг нь хагалан, хулгай хийж байсан автомашинууд бүгд "Toyota Prius-20" маркийн автомашинууд байсан байгаа юм. Тиймээс иргэд автомашинаа харуул хамгаалалттай газарт байрлуулж, эд зүйлээ хулгайчаас хамгаалж байхыг дахин сануулъя.

Н.Цэндбат