АМЕРИКИЙН ОНГОЦЫГ СӨНӨӨНӨ ГЭЖ УМАРД СОЛОНГОСЫН САЙД МЭДЭГДЭВ

Умард Солонгосын Гадаад хэргийн сайд Ли Ен Хо АНУ-ын Нью-Йорк хотын Millenium Plaza зочид буудалд сэтгүүлчдэд мэдэгдэл хийхдээ "Бид АНУ-ын стратегийн бөмбөгдөгч онгоцыг сөнөөх болно" гэжээ.

"АНУ эхэлж манай улсад дайн зарласан гэдгийг дэлхий дахин маш сайн санах хэрэгтэй. Тэд бидэнд дайн зарласан болохоор бид хариу үйлдэл үзүүлэх ёстой. АНУ-ын стратегийн бөмбөгдөгч онгоцууд манай улсын агаарын нутаг дэвсгэрт биш байлаа ч гэсэн бид тэднийг сөнөөх эрхтэй" гэж Ли Ен Хо мэдэгдсэн байна.

"Трамп ямар хүн бэ гэдгийг бүгд харья. Тэр бол сэтгэлзүйн хувьд тогтворгүй, өөрийгөө хэт өргөмжлөх үзэлтэй, өөртөө хэт бардсан нэгэн. Америкийн ард түмэн хүртэл түүнд дургүй. "Худал хуурмагийн хаан", "Хорон санаат Ерөнхийлөгч" гэх мэт нэршлийг тэр ард түмнээсээ хүртсэн. Амьдралынхаа туршид худал хуурмаг, сүрдүүлэг дарангуйллыг ашигласаар ирсэн хүн одоо "улаан товчлуур"-ыг дарах эрхийг авсанд хэргийн гол учир оршиж байна. Энэ нь дэлхий дахины өнөөгийн энх амгалангийн гол аюул юм" гэж Ли Ен Хо мэдэгджээ.

М.Болджин