АВТОМАШИНААС ХУЛГАЙ ХИЙЖ БАЙГААД ҮЙЛДЭЛ ДЭЭРЭЭ БАРИГДЛАА

Цагдаагийн байгууллагад энэ сарын 24-ний 05 цагаас 25-ны 05 цагийн хооронд гэмт хэргийн шинжтэй 54 үйлдэл бүртгэгдсэнээс 31 нь хулгайн гэмт хэрэг байжээ. Сүүлийн жилүүдэд нийслэлд хулгайн хэрэг нэлээд бүртгэгдэх болсон байна. Тиймээс иргэд энэ төрлийн гэмт хэрэгт өртөж, эд хөрөнгөөрөө хохирохоос байнга урьдчилан сэргийлж байхыг анхааруулъя.

Хоногт бүртгэгдсэн хулгайн гэмт хэргээс олон нийтэд сэрэмжлүүлэг болгох үүднээс дараах хэргүүдийг онцлон хүргэж байна.

БГД-ийн 16-р хорооны оршин суугч Б-ийн гэрт нь 10:00-13:00 цагийн хооронд хулгай орж, "Samsung" зөөврийн компьютер 1ш, дунд гарын мөнгөн аяга 6ш, дунд гарын алтан нуухтай Чүнчигноров хөөрөг 1ш авчээ. Уг хэргийг Говьсүмбэр аймаг харъяат 18 настай А үйлдсэнийг илрүүлэн шалгаж байна.

БЗД-ийн 23-р хороонд 16 цагийн орчим иргэн Э-ын сууцанд хулгай орж, зурагт алга болсон бөгөөд уг хэргийг БЗД-ийн 8-р хороонд оршин суух Б үйлдсэнийг илрүүлэн шалгаж байгаа юм.

Орон байрны хулгайгаас гадна автомашины цонх хагалж, эд зүйл хулгайлах тохиолдол нэлээд бүртгэгдэж байгаа юм.

Тухайлбал,

ХУД-11 "Сэргээн засах клиникийн гадна байсан автомашинд хулгай орсон байна" гэсэн мэдээллийг 09-р сарын 23-нд шалгахад СХД-6 хороонд оршин суух Ө-ийн "Тoyota Prius-20" автомашины толиний хавтас1ш, СБД-13 хороонд оршин суух -гийн "Тoyota Prius-20" автомашины толиний хавтас 2ш, ХУД-15 хороонд суух Д-ийн "Тoyota Prius-20" автомашины толиний хавтас 1ш, БЗД-6 хороонд суух Ү -ийн "Тoyota Harrer" автомашины толиний хавтас 2ш нийт 5-н автомашины толиний хавтас 6-г, БЗД-2 хороонд А хулгайлсныг шуурхай эрэн сурвалжилж илрүүлэн шалгаж байна.

Мөн БГД-7 "байрны гадна байсан автомашинд хулгайч байна" гэсэн мэдээллийг 09-р сарын 23-нд авч шалгахад: Дорнод аймаг: Дашбалбар сумын харъяат Б /эр.75н/-ийн "Toyota Corolla" автомашины зүүн хойд хаалганы гурвалжин шилийг, СХД-28хороонд суух А хаглан хулгай хийж байсныг үйлдэл дээр нь илрүүлэн шалгаж байна.

СБД-8 "байрны гадна байсан автомашины шил хагарсан байна" гэсэн мэдээллийг 09-р сарын 24-нд авч шалгахад: СБД-8 хороонд суух Б-ын "TOYOTA Prius-20" автомашины цонхыг, БГД-18 хороонд суух Б , ЧД-13 хороонд суух А нар бүлэглэн хагалж эд зүйл хулгайлж байсныг үйлдэл дээр нь илрүүлэн холбогдох харъяа дүүргийн цагдаагийн хэлтсүүд шалгаж байгаа аж.

Тиймээс иргэд автомашинаа харуул хамгаалттай, камертай газарт байрлуулж, эд хөрөнгөө хулгайчдаас хамгаалахыг цагдаагийн байгууллагаас анхааруулж байна.

Б.Ирээдүй