ХУЛГАЙН ГЭМТ ХЭРГИЙГ АВТО ЭРГҮҮЛИЙН АЛБА ХААГЧИД ШУУРХАЙ ИЛРҮҮЛЖЭЭ

Цагдаагийн байгууллагад бүртгэгдэж байгаа хэргийн ихэнх хувийг хулгай, дээрмийн гэмт хэрэг эзэлж байгаа. Тодруулбал, Баянзүрх дүүргийн 18 дугаар хороо, РС тоглоомын газарт тоглож байсан М-ийн гар утас, бэлэн мөнгийг тус дүүргийн 5 дугаар хороонд оршин суух Т хулгайлсан байна. Мөн Сүхбаатар дүүргийн нэгдүгээр хороо, М-ыг бааранд үйлчлүүлж байх үед гар цүнхтэй "Samsung note-3", "Nokia" гар утас, гоо сайхны хэрэгслийг Увс аймгийн Хяргас сумын харьяат С хулгайлжээ.

Сүхбаатар дүүргийн 15 дугаар хороо, Г-ийн амбаарт байсан эд зүйлийг тус дүүргийн 15 дугаар хороонд оршин суух Б хулгайлсан байна. Мөн Хан-Уул дүүргийн 15 дугаар хороо, Б-г бааранд үйлчлүүлж байхад бэлэн мөнгөтэй түрүүвчийг Баянзүрх дүүрэгт оршин суух хаягтай А хулгайлжээ. Хулгайд эд зүйлээ алдсан гэх мэдээллийн дагуу цагдаагийн авто эргүүлийн алба хаагчид шуурхай илрүүлэн, харьяа дүүрэг дэх цагдаагийн хэлтсүүдэд шалгаж байгаа юм.

Иймд иргэд та бүхэн гэмт хэрэг, зөрчилд өртөж хохирохоос урьдчилан сэргийлж, хулгайд алдсан бол цагдаагийн байгууллагын 102 тусгай дугаарын утас болон харьяа дүүрэг дэх цагдаагийн хэлтэст хандахыг зөвлөж байна гэж Нийслэлийн цагдаагийн газраас цахим хуудсаараа дамжуулан мэдээллээ.