ЖЕННИФЕР ЛОПЕС ГЭРИЙНХЭНТЭЙГЭЭ ХОЛБОО БАРЬЖ ЧАДАХГҮЙ БОЛЖЭЭ

Нэрт дуучин, жүжигчин Женнифер Лопес олон нийтийн сүлжээгээрээ дамжуулан Пуэрто-Рико дахь гэрийнхэнтэйгээ холбоо барьж чадахгүй байгаагаа дурьджээ. Ирма болон Мариа хар салхины улмаас Пуэрто-Рикод олон хүний амь эрсдэж, байшин сүйдэж, цахилгаан бүрэн тасраад байгаа юм.

"Сайн уу, би Женнифер Лопес байна. Царай зүс минь тийм сайхангүй байна. Лас Вегаст ажилтай байгаа ч одоо энэ ажил нэг их чухал биш санагдана. Одоо би зөвхөн Пуэрто-Рикод болж буй гамшгийн тухай бодож, санаа зовж байна. Пуэрто-Рикод байгаа гэрийнхнийхээ талаар ойрд юу ч дуулж мэдсэнгүй. Туслахыг их хүсэвч чадахгүй сууна. Ирма болон Мариа хэмээх хоёр аймшигтай хар салхины улмаас миний төрөлх улс орон сүйдлээ. Пуэрто-Рикод одоо тусламж хэрэгтэй байна. Та нартаа хайртай шүү, эх орныхон, гэрийнхэн минь" хэмээн Женнифер Лопес өгүүлжээ.

Женнифер Лопесийн эцэг эх Пуэрто-Рикогоос АНУ руу цагаачлан гарсан юм. Гэлээ ч Пуэрто-Рикод тэдний ар гэрийнхэн, хамаатан санад үлдсэн ажээ. Сүүлийн мэдээгээр бол Женнифер Лопес байгалийн гамшигт нэрвэгдсэн Пуэрто-Рико улсын ард түмэнд 1 сая ам.долларын хандив өргөхөөр болжээ.

М.Болджин