ХАРУМАФҮЖИ: СЭТГЭЛЭЭРЭЭ ЯЛАГДАХГҮЙ ГЭЖ БОДСОН...

Мэргэжлийн Аки башёд улсын заан Рэгжийбуугийн Даваанямын бага хүү, мэргэжлийн сумогийн 70 дахь ёкозүна Харумафүжи Д.Бямбадорж түрүүлж, Японы Эзэн хааны цомыг ес дэх удаагаа гардсан.

Тэрбээр Аки башёгийн эхний таван өдрийн барилдааны дараагаар гурван ч удаа унаж, улмаар түрүүлэх найдлагагүй мэт сэтгэгдэл үүсгэсэн ч аажимдаа чангарч, өрсөлдөгчдөө ялсаар тэмцээний сүүлчийн өдөр озэки Гоэйдог давж, 11 даваа, 4 дөрвөн унаатайгаар түрүү бөхийн төлөө дахин барилдсан. Нэмэлт барилдаанд дахин Гоэйдог давснаар Харумафүжи түрүүлсэн юм.

Тэмцээний гурав дахь өдөр Котошогикүтай барилдахдаа өрсөлдөгчөө гараа дэвжээнд хүргээгүй буруу боссоныг анзааран барилдаагүй ч гэсэн шүүгч нар Харумафүжиг ялагдсанд тооцож, шударга бус шийдвэр гаргасан. Үүний дараагаар хоёр дараалан дахиж унасан Харумафүжи түрүүн хэлсэнчлэн яван чангарч, энэ башёд барилдсан ганц ёкозүнагийн үүргээ сайн биелүүлж түрүүлж чадсан юм.

Түүнийг түрүү хүртсэний дараагаар мэргэжлийн сумогийн 68 дахь ёкозүна Асашёорюү Д.Дагвадорж Японд очиж, АСА станцаараа монголчууддаа шууд яриаг нь дамжуулсан. Харумафүжигаас Асашёорюү "Араас нь хөөж барилдах хэцүү байв уу" гэж асуухад "Хэцүү байлаа. Гэхдээ ямар ч байсан сэтгэлээрээ ялагдахгүй гэж бодсон. Ухрах зам байхгүй, урагшаа харж барилдлаа. Монголын ард түмэн, өвөг эцэг, аав ээжийнхээ буян хишгээр энэ сайхан хувь тавиландаа их баярлаж байна. Олон жил та бүхнээ баярлуулахыг хичээнэ ээ" хэмээн хариулсан юм.

Мэргэжлийн сумогийн Аки башёд эдүгээ цагийн дөрвөн ёкозүнагаас Хакухо М.Даваажаргал, Какурюү М.Ананд, Кисэносато нар гэмтлийн улмаас барилдаагүй тул ганц ёкозүна Харумафүжи Д.Бямбадорж босон барилдсан юм.