ЭРЛИЙН НОХОЙ СУРГАХ 6 САРЫН СУРГАЛТ БОЛЛОО

Цагдаагийн ерөнхий газрын даргын 2017 оны Б/58 дугаар тушаалаар батлагдсан "Цагдаагийн алба хаагчдын мэдлэг, ур чадварыг дээшлүүлэх 2017 оны сургалтын төлөвлөгөө"-ний дагуу Гэмт хэрэгтэй тэмцэх албанд эрлийн нохой сургах 6 сарын сургалтыг Цагдаагийн ерөнхий газрын харъяа Сургалтын нэгдсэн төвд зохион байгуулж, төгсөлтөө хийлээ.

Сургалтад Архангай, Баянхонгор, Баян-Өлгий, Булган, Говь-Алтай, Дархан-Уул, Дорноговь, Орхон, Увс, Завхан, Ховд, Хөвсгөл, Өвөрхангай, Өмнөговь аймаг дахь Цагдаагийн газруудын эрүүгийн туслах төлөөлөгч нар болон Сургалтын нэгдсэн төвийн Албаны нохойн сургалтын хэлтсийн гурван алба хаагч тус тус хамрагдсан.

Энэ удаагийн сургалтаар албаны нохойг эрэл мөрдлөгийн чиглэлээр сургаж дасгалжуулан, алба хаагчдад мэргэжлийн чиг баримжаа олголоо.

Тухайн сургагдсан албаны нохдыг төв, орон нутагт үйлдэгдэж байгаа гэмт хэргүүдэд шууд ба шууд бус хэлбэрээр ашиглан гэмт хэрэг илрүүлэх, урьдчилан сэргийлэх ажилд дэмжлэг үзүүлэн ажиллах юм.

Энэ удаагийн сургалтын онцлог нь өндөр хөгжилтэй орнуудын албаны нохой сургах арга барил, техник арга зүй дээр тулгуурлан явуулж, Төв орон нутгийн цагдаагийн газар хэлтсүүдийг Албаны нохойн сургалтын хэлтсийн үржлийн хэсэгт төрсөн гөлгөн нохдоор хангаж өгснөөрөө онцлог бөгөөд өмнө нь хувь хүн, үржлийн газруудаас нохойг худалдаж авахад төсвийн хүндрэл үүсдэг байсан асуудлыг шийдсэнээрээ давуу талтай боллоо.

Төгсөлтийн арга хэмжээнд ЦЕГ-ын Төлөвлөлт, бодлогын хэрэгжилтийн хэлтсийн дарга, цагдаагийн хурандаа Ж.Баясгалан, Сургалтын нэгдсэн төвийн дарга, цагдаагийн хурандаа Б.Цогтбаяр болон Сургалтын нэгдсэн төвийн алба хаагчид оролцлоо.