ДЭЛХИЙН ХАМГИЙН БАЯН ЭМЭГТЭЙ 94 НАСАНДАА ТААЛАЛ ТӨГСЛӨӨ

Дэлхийн хамгийн баян эмэгтэй, гоо сайхны L`Oreal компанийн эзэн Лилиан Беттанкур 94 насандаа таалал төгсчээ. Forbes-оос гаргасан дэлхийн толгой баячуудын жагсаалтад тэмдэглэснээр бол Лилиан Беттанкурын хөрөнгө 44.7 тэрбум ам.доллар юм.

Тэрбээр 1909 онд өөрийн эцэг Эжен Шюллегийн үүсгэн байгуулсан L`Oreal компанийн хувьцааны 33 хувийг эзэмшиж байлаа. Түүний охин Франсуаза Беттанкур-Мейерс эхийнхээ амьсгал хураасан тухай мэдээг нотолжээ.

"Ээж минь энэ ертөнцөөс зовлон тарчлал амсалгүй явлаа" гэж охин нь мэдэгдсэн байна. Лилиан Беттанкур өнгөрсөн шөнө Парис дахь гэртээ эцсийн амьсгалаа татжээ.

2007 онд Лиллиан Беттанкур нэгэн найздаа нэг тэрбум евро бэлэглэсэн явдал охиных нь бухимдлыг төрүүлж, улмаар шүүхэд хандсанаар өндөр настай эхээ асран хамгаалах эрхийг авсан юм.

L`Oreal компани нь гоо сайхны Lancome, Maybelline, Urban Decay, Ives Saint Laurent, Kiehl`s зэрэг 30 гаруй брэндийг эзэмшигч юм. Дэлхийн 140 гаруй оронд бараагаа борлуулдаг тус компани 2016 онд 25.8 тэрбум еврогийн орлоготой ажиллажээ.

М.Болджээ