​ТӨСВИЙН АШГИЙН 50 ХУВИАР ӨР ЗЭЭЛИЙН ХЭМЖЭЭГ БАГАСГАНА ГЭЛЭЭ

Улсын төсөв 900 тэрбум гаруй төгрөгийн ашигтай байгаа тухай таатай мэдээлэл бий. Тэгвэл энэхүү нэмж давсан орлогын 50 хувиар хуримтлал үүсгээд ирэх онд гаргах өр зээлийн хэмжээг багасгахаар сангийн яамнаас төлөвлөж байгаа аж. Харин үлдсэн 50 хувийг нь зайлшгүй шаардлагатай өвөлжилтийн бэлтгэл ажил, сүүлийн 3-4 жил хуримтлагдаж ирсэн шүүхийн шийдвэртэй холбоотой зардлууд, сургууль, цэцэрлэг гэх мэт чухал чухал салбарын асуудалд ч тусгаж өгөх юм байна. Сангийн дэд сайд Х.Булгантуяа "Нэмж давсан орлогын 50 хувиар хуримтлал үүсгээд ирэх онд гаргах өр зээлийн хэмжээг багасгана. Үлдсэнээр нь зайлшгүй шаардлагатай өвөлжилт болон сүүлийн 3-4 жил хуримтлагдаад ирсэн шүүхийн шийдвэртэй холбоотой зардлуудад тусгаж өгнө. Мөн түрүүн хэлсэнчлэн сургууль, цэцэрлэг гэхчлэн нэн чухал салбарын асуудалд тусгасан байгаа.

Жишээ нь, Эрүүл мэндийн салбарт өндөр өртөгтэй мэс заслыг хувийн эмнэлгүүд ЭМЯ-тай гэрээ байгуулсанаар хийж гүйцэтгэдэг. Энэхүү зардлыг улсаас даадаг болсон. Үүнтэй холбоотойгоор улсын төсөвт 10 гаруй тэрбум төгрөгийг нэмэлт зардлаар тусгаж өгсөн. Мөн аймаг орон нутгийн тулгамдаад буй асуудлууд бий. Тодруулбал, сургууль цэцэрлэгийн халаалтыг энэ сарын 15-наас өгдөг. Тэгэхээр өмнө нь буюу 2017 оны төсөвт тусгагдаагүй зардлуудыг энэ оны төсөвт тусгаж байна гэсэн үг" хэмээв.