250 ЖИЛИЙН ДАРААГААР ГЕРМАНД ҮЗЭГДСЭН ЗЭРЛЭГ ҮХРИЙГ БУУДАН ХӨНӨӨЖЭЭ

Германы Берлин хотоос 88 километрийн зайд орших Лебус хотын нутаг Одра мөрний эрэг дээр өнгөрсөн есдүгээр сарын 13-нд зубр зэрлэг үхэр үзэгджээ. Герман улсын нутаг дэвсгэрт сүүлийн 250 жилийн хугацаанд иргэншлийн улмаас зэрлэг үхэр огт үзэгдээгүй юм.

Зэрлэг үхэр Герман-Польшийн хилийн ойролцоо орших Уисц-Вартын амьтдын хүрээлэнгээс алдагдсан байж магадгүй гэнэ. Гэвч зэрлэг үхрийг иргэдэд аюул тарьж магадгүй хэмээн буудан хөнөөжээ.

"250 жилийн дараагаар Германд зэрлэг үхэр үзэгдсэн ч орон нутгийн удирдлага түүнийг буудан хөнөөхөөс өөр зүйл бодож олж чадсангүй" гэж Байгаль Дэлхийг хамгаалах Олон Улсын сангийн гишүүн Крис Хейнрих мэдэгджээ.

Зэрлэг үхэр зубр нь "Улаан ном"-д бичигдсэн амьтан юм. 1927 онд энэ төрлийн амьтныг мөхөж устаж буй амьтдын тоонд багтааж, дархалжээ.

М.Болджин