​"ЭРҮҮЛ ХҮНС- ЭРҮҮЛ МЭНД" АМТАЛГААТ ӨДӨРЛӨГ ЦЭЦЭРЛЭГ ХОТНОО

Франц Монголын хамтран хэрэгжүүлж буй "Архангай аймгийн хүн амын эрүүл мэнд-хоол тэжээл" /2016-2018/ төслийн хүрээнд Амталгаат өдөрлөгийг Цэцэрлэг хотод зохион байгуулж байна. Энэхүү өдөрлөгөөр эрүүл зохистой хооллолт, түүний эрүүл мэндэд үзүүлэх нөлөө, нарны эрчим хүчний хүлэмжийн танилцуулга, сумдын эрүүл мэндийн төвийн тогооч нарын бэлтгэсэн хоолны амталгаа зэргийг танилцуулан сурталчилж байна.

Франц улсын Санте Сюд, Жерес ТББ-ууд хамтран "Архангай аймгийн хүн амын эрүүл мэнд-хоол тэжээл" төслийг Хашаат, Чулуут суманд хэрэгжүүлж байгаа билээ. Уг төслийн хүрээнд Жерес ТББ-аас Хашаат, Чулуут сумын эрүүл мэндийн төвд нарны эрчим хүчний хүлэмжийг барьж өгч, хүлэмжийн аж ахуй эрхлэх аргачлал, арчилгаа, хүнсний ногоо тариалалтын чиглэлээр сургалтууд зохион байгуулсан юм.

Санте Сюд ТББ нь 2009 оноос Архангай аймгийн бүх сумдын ЭМТ-тэй хамтран ажиллаж ирсэн бөгөөд төслийн хүрээнд сумдын ЭМТ-ийн хамт олон, сургууль, цайны газрын тогооч нарт хоол тэжээлийн чиглэлээр ур чадварыг бэхжүүлэх сургалт явуулж, хүн амын шим тэжээлийн хэрэгцээнд тохирсон, тэнцвэрт хоолны цэс гаргах талаар зааж сургасан байна.

Архангай аймгийн хувьд Аймгийн Засаг даргын "Хэрэглэгчээс-Үйлдвэрлэгч" аймаг болох хөтөлбөрийн хүрээнд Иргэдийн эрүүл баталгаат хүнс хэрэглэх нөхцөлийг бүрдүүлэх, хүнсний бүтээгдэхүүний бэлтгэл, боловсруулалт, хадгалалт, тээвэрлэлт, борлуулалтын тогтолцоог бий болгож, байгаль орчинд ээлтэй бүтээгдэхүүн үйлдвэрлэлийг дэмжинэ гэсэн зорилт ийнхүү шат дараатай хэрэгжиж байгаа юм.