​НҮҮРС ТЭЭВРИЙН МАШИНУУД МАЛЫН БЭЛЧЭЭР ТАЛХАЛЖ ЭХЭЛЛЭЭ

Манай улс Хятадаас орж ирж байгаа бараа бүтээгдэхүүнд хориг тавьж эхэлснээр урд хөрш хил гаалиа чангатгаад багагүй хугацаа өнгөрчээ. Тухайлбал, нүүрс тээвэрлэлтийн тухайд урьд нь өдөрт 1000 гаруй нүүрс тээвэрлэгч автомашиныг хилээр нэвтрүүлдэг байсан бол одоо өдөрт 300 автомашиныг л татаж байгаа аж. Өмнө нь 1000 гаруй автомашиныг татдаг байхад цаана нь 10 гаруй километрын цуваа үлддэг байсан бол одоо энэ тоо хэд дахин нэмэгдээд байгааг аж. Өөрөөр хэлбэл, нүүрс тээвэрлэлтийн нэг автомашиныг хилээр нэвтрүүлэхийн тулд жолооч нар нь Гашуун сухайтын боомт дээр 10-15 хоног дугаарлах нь хэвийн үзэгдэл болсон байна. Үүнтэй холбоотойгоор цувааны урдуур орох гэсэн жолооч нар хулгайн зам гаргаж, малын бэлчээрийг талхалхаас гадна ноцтой зам тээврийн ослууд ихээр гаргаж байгааг нутгийн иргэд бидэнд мэдээллээ.

Өнгөрсөн долоо хоногийн сүүлээр хулгайн замаар нүүрс тээвэрлэж байсан автомашин гурван тэмээг дайрсан хэрэг гарчээ.

Уг нь Говийн зам ХХК-ийн тавьсан Цогтцэцийгээс Цагаан хад хүрэх замаар нүүрс тээвэрлэх учиртай атал жолооч нар одоо Оюутолгой ХХК-ийн баяжмал тээвэрлэлтийн замаар тээвэрлэж эхэлсэн байна.

Энэхүү байдлыг тус компаниас таслан зогсоохын тулд Оюутолгойн зүүн хаалган дээр пост гаргасан аж. Гэтэл одоо постыг тойрч, цаад талынх нь шороон замаар тойрч малчны хотоор дайран өнгөрч, Оюутолгойн баяжмал тээвэрлэлтийн зам руу нийлж, тээвэрлэлт хийснээс ийм эмгэлнэлт осол болжээ.