ДОЛООН НАСТАЙ ХҮҮГИЙН НҮДНИЙ ӨМНӨ ЭЦЭГ ЭХ БАС АХ НЬ АМИА АЛДЖЭЭ

Италийн Неаполийн ойролцоохь Сольфатарын галт уулын бэлд маш эмгэнэлтэй явдал болжээ. Долоон настай бяцхан хүүгийн нүдний өмнө эцэг эх бас ах нь нас баржээ.

12 настай хүү Лоренцо Сольфатарын галт уулыг эцэг эх дүүгийнхээ хамт үзэхээр очихдоо аюултай бүсийг үл ойшоон гүйж орсоноор доош цөмөрч унасан бөгөөд хүүгээ аврахаар араас нь ухасхийсэн эцэг эх нь ч мөн амиа алдсан байна. 12 настай Лоренцогийн эцэг 45 настай Массимилиано Каррер болон эх 42 настай Тизиана нарыг амиа алдсаныг тухайн үед ойролцоо байсан хүмүүс огт анзааралгүй өнгөрчээ. Харин долоон настай хүү нь энэ аймшигт явдлыг нүдээр харж, айж цочирдон уйлсан тул хавь ойрын хүмүүс анзаарч, хэрэг явдлыг мэдэж, цагдаа дууджээ.

Эцэг эх нь долоон настай хүүгээ суусан газраасаа огт босохгүй байхыг сануулсны хүчинд амьд үлдсэн бололтой.

"Нэг хүү уйлж байхыг би харсан. Эхэндээ ч зүгээр уйлаа биз гэж бодсон. Гэвч амьдралынхаа хамгийн аймшигтай явдлыг дараа нь олж үзлээ. Би ч гэсэн эцэг хүн. Газар цөмөрснийг хараад би юу болсныг ойлгосон. Дараа нь аврах ангийнхан ирж цогцоснуудыг гаргасан. Одоо ч би тэр гэр бүлийн эмгэнэлт явдлын талаар, тэр хүүгийн уйлж суусныг бодсоор байна" хэмээн Сольфатарын галт уулын ойролцоо пиццаны газар ажиллуулдаг Диего Витаглиано өгүүлжээ.

Долоон настай хүүг удалгүй эмээ өвөө нь ирж авсан гэнэ. Галт уул судлаачдын үзэж буйгаар ойрын хоногуудад бороо ихтэй байсан тул энгэр газрын гадаргуу хэврэгшиж, цөмөрсөн байх магадлалтай юм байна.

М.Болджин