АЙМШГИЙН КИНОНЫ ТҮҮХЭН ДЭЭД АМЖИЛТЫГ IT ЭВДЛЭЭ

Дэлгэцнээ дөнгөж гараад буй Андрес Мускеттийн найруулсан It кино хамгийн өндөр орлоготой аймшгийн киноны түүхэн дээд амжилтыг эвдээд байна. Тус кино АНУ-ын 4103 кинотеатрт зэрэг гарч эхлээд эхний долоо хоногтоо 111.2 сая ам.долларын орлого олжээ. Үүнээс өмнө 2011 онд гарсан Paranormal Activity 3 кино эхний долоо хоногтоо 52.6 сая ам.долларын орлого олсон нь энэ жанрын кинонуудын дээд амжилтад тооцогдож байсан юм.

Мөн It кино нь есдүгээр сард хамгийн өндөр орлого олсон киногоор тодорсон байна. Андрес Мускеттийн энэхүү бүтээл нь Стивен Кингийн романаас сэдэвлэн бүтээж 1990-ээд онд дэлгэцнээ гарсан киноны нэг хувилбар нь болжээ.

Америкийн нэгэн жижиг хотод Пеннивайз хэмээх алиалагчийн дүр бүхий жихүүдэс төрүүлэм этгээд хүүхдүүдийг хулгайлж, тарчлааж байгаа талаар кинонд өгүүлдэг. Гол дүрийг Шведийн 27 настай жүжигчин Билл Скаргард бүтээсэн байна.

М.Болджин