ЖАН-КЛОД ВАН ДАММЫН ХҮҮ ХҮН БАРЬЦААЛЖ, ХАР ТАМХИ ХАДГАЛСАН ХЭРГЭЭР БАРИВЧЛАГДЖЭЭ

Тулаант киноны баатар, нэрт жүжигчин Жан-Клод Ван Даммын хүү 21 настай Николас Ван Варенберг АНУ-ын Аризона мужийн Темпе хотын Цагдаагийн газарт түр саатуулагдаад байгаа гэнэ. Түүнийг хүн барьцаалсан болон хар тамхи хадгалсан хэрэгт буруутган шалгаж эхэлжээ.

Өнгөрсөн есдүгээр сарын 10-нд нэгэн байшингийн цахилгаан шатыг гэмт этгээд эвдэж сүйдэлсэн тухай дуудлага Цагдаагийн газарт иржээ. Цагдаа нар очиж шалгахад Николас Ван Варенберг цахилгаан шатанд уураа гаргаж, гараа шалбалсан байдалтай байсан аж. Цагдаа нар түүнийг зөрчил гаргасныг сануулаад буцсан гэнэ.

Гэвч үүнээс 20 минутын дараагаар дахин Цагдаагийн газарт мөн өмнөх айлын хаягаар дуудлага иржээ. Энэ удаад хүн барьцаалагдсан гэж дуудлага өгсөн байна. Хэргийн газар очиход Николас Ван Варенберг цагдаа нарт байшингийн хаалгыг нээж өгсөн хөршдөө хорсон, хутгаар сүрдүүлсэн нь тогтоогджээ. Мөн түүний гэрт нэгжлэг хийхэд марихуан илэрсэн байна.

Ийнхүү хүн барьцаалсан болон хар тамхи хадгалсан давхар хэрэгт нэрт жүжигчний хүү холбогдоод байгаа аж.

Харин Ван Даммын нэр хүүгийнхээсээ зөрөөд байгаагийн учир нь нэрт жүжигчний жинхэнэ нэрийг Жан-Клод Камиль Франсуа Ван Варенберг гэдэг. Тэрбээр 1960 оны аравдугаар сарын 18-нд Бельгийн Беркем-Сент-Агат хотноо нягтлан бодогч болон цэцгийн дэлгүүрийн эзний гэрт мэндэлсэн.

1979 онд Европын каратэгийн аварга болж, Дэлхийн аварга шалгаруулах тэмцээнд оролцож байжээ. Харин 1980-аад онд АНУ руу цагаачлан гарч, 1986 онд анхны гол дүрээ бүтээсэн юм.

Тэрбээр Америкийн жүжигчин бүсгүй Дарси Ляпьертай гэрлэж гурван жил ханилахдаа Николас хүүгээ өлгийдөн авсан ажээ.

Жан-Клод Ван Дамм нийтдээ таван удаа гэрлэсэн байдгаас бодибилдингийн тамирчин Глэдис Португезтай хоёр ч удаа гэрлэсэн юм. Тэрбээр Николасаас гадна Кристофер, Бьянка хэмээх хоёр хүүхэдтэй ажээ.

М.Болджин