МЭРГЭЖЛИЙН СУМОД ОЙРЫН 18 ЖИЛ ТОХИОЛДООГҮЙ ГЭМТЭЛ НҮҮРЛЭВ

Мэргэжлийн сумогийн Аки башёгийн хоёр дахь өдөр озэки Такаясү-комүсүби Тамаваши Б.Мөнх-Оргил нарын барилдааны төгсгөлд хоёр сумоч хоёулаа гэмтэл авсан. Тэгвэл манай сумоч Тамаваши Б.Мөнх-Оргил шагайны бэртлээ тэвчин цаашид үргэлжлүүлэн барилдахаар болсон байна.

Харин озэки Такаясү баруун гуяндаа гэмтэл авсан тул ойрын 21 хоногт эмчилгээ хийлгэж, гам барих хэрэгтэй гэж эмч нар зөвлөсөн аж. Ийнхүү отгон озэки Такаясү Аки башёг орхилоо.

Ингэснээр энэ удаагийн башёд гурван ёкозүна /Хакухо М.Даваажаргал, Какурюү М.Ананд, Кисэносато/ нар тэмцээний эхнээс барилдаагүй бол гурав дахь өдрөөс озэки Такаясү мөн жагсаалаас гарав. Эдүгээгээс 18 жилийн өмнө ёкозүна Таканохана, Акэбоно, Ваканохана болон озэки Чиётайкай нар гэмтлийн улмаас барилдалгүй өнжиж байжээ. Харин үүнээс хойш гурван ёкозүна, нэг озэки тэмцээнийг өнжсөн тохиолдол гараагүй юм.

Үүнээс гадна энэ удаагийн Аки башёгийн Макүүчи буюу дээд зиндаанд долоон бөх гэмтлийн улмаас барилдахааргүй болсон нь ойрын 10 жилд үзэгдээгүй явдал боллоо. Өчигдрийн барилдааны үеэр гэмтэл авсан Ура мөн ойрын хэдэн хоногтоо барилдаж чадахааргүй болжээ. Гэхдээ хэд хоногийн дараагаар дахин дохёд гарах магадлал бий гэнэ.

М.Болджин