АВАРГУУДЫН ЛИГ ӨНӨӨДӨР ЭХЭЛНЭ

Европын хөлбөмбөгийн клубүүдийн дундахь хамгийн нэр хүндтэй, ашиг орлого өндөртэй тэмцээн болох Аваргуудын лигийн хэсгийн эхний тоглолтууд өнөөдөр явагдана. Энэ улирлын Аваргуудын лигийн найман хэсэгт нийтдээ 32 баг уламжлал ёсоор өрсөлдөнө. Хэсэг бүр дөрвөн багтай. Хэсэгтээ эхний хоёр байр эзэлсэн багууд дараагийн шатанд шалгарах бол гуравдугаар байр эзэлсэн баг Европа лиг рүү шилжих юм. Харин хэсэгтээ хомоол хамсан баг тэмцээнээ дуусгана.

Энэ удаад H хэсгийг "Үхлийнх" гэж тодотгож байна. Үхлийн гэгдсэн хамгийн ширүүн тулаан гарах учиртай энэ хэсэгт Аваргуудын лигийн аваргын алдрыг хамгаалагч Испанийн "Реал Мадрид", Германы хүчирхэг "Боруссиа Дортмунд", Английн "Тоттенхэм" мөн Киприйн АПОЭЛ багтсан.

Өнөө шөнө А, В, С, D хэсгийн тоглолтууд явагдана. Тодруулбал:

"Олимпиакос" Грек – "Спортинг" Португал

"Барселона" Испани – "Ювентус" Итали

"Манчестер Юнайтед" Англи – "Базель" Швейцарь

"Бенфика" Португал – ЦСКА ОХУ

"Рома" Итали – "Атлетико Мадрид" Испани

"Челси" Англи- "Карабах" Азербайжан

"Селтик" Шотланд – ПСЖ Франц

"Байерн Мюнхен" Герман – "Андерлехт" Бельги ... гэсэн тоглолтууд өнөө шөнө Улаанбаатарын цагаар 02:45-д зэрэг эхэлнэ.

Эдгээр найман тоглолтоос "Барселона"-"Ювентус"-ын тоглолт олны анхаарлыг илүүтэй татах нь гарцаагүй. Хоёр жилийн өмнө хоёр баг Аваргуудын лигийн аваргын төлөөх тоглолтод шалгаран хоорондоо тулахад каталанчууд 3:1-ээр ялалт байгуулж, "Дэлдэн чихт"-ийг өргөсөн.

Тэгвэл зургаан сарын өмнө хоёр баг Аваргуудын лигийн хасагдах шатанд таарахад Турины баг 3:0, 0:0 гэсэн үзүүлэлтээр даагаа нэхэж, ялагчаар тодорсон юм. Ийнхүү хоёр улирал дараалан Аваргуудын лигт таарсан хоёр баг энэ удаад гурав дахь улиралдаа дахин таарсан төдийгүй бүр нэг хэсэгт ороод байна.

Мөн өнөө шөнийн тоглолтуудаас Италийн "Рома" талбайдаа Испанийн "Атлетико Мадрид"-тай тулах тул сонирхолтой ширүүн тулаан өрнөх биз ээ.

Азербайжан улсаас анх удаагаа Европын клубүүдийн хамгийн нэр хүндтэй тэмцээнд баг нь оролцох гэж байна. "Карабах"-чууд Английн аварга "Челси"-тэй тэдний талбайд нүүр тулна.

Үүнээс гадна энэ зуны наймааны цонхоор Неймарын төлөө 222 сая евро гаргаж, Килиан Мбаппег ирэх зун 180 сая еврогоор авахаар тохиролцоо хийгээд зээллэгээр авчихсан ПСЖ-ийнхэн өнгөрсөн улиралд Шотландад авч болох бүхий л цомыг гардсан "Селтик"-тэй талбайд нь тоглох юм.

Ийнхүү хөлбөмбөгийн хорхойтнуудын тэсэн ядан хүлээж буй Аваргуудын лиг эхлэхэд хэдхэн цаг үлдээд байна.

М.Болджин