ИРМА ХАР САЛХИ РУУ БУУДАХГҮЙ БАЙХЫГ САНУУЛЖЭЭ

АНУ-ын Зүүн өмнөд нутаг Флорида муж руу Ирма хар салхи гамшиг дагуулан зүглэж байна. Хэдхэн хоногийн өмнө Техас мужийн эргийн бүс нутгуудыг сүйдэлсэн Харви хар салхиас Ирмаг илүү хүчтэй, аюултай гэж мэргэжилтнүүд дүгнэсэн.

Ирма хар салхи Куба болон Карибын тэнгис дэх олон арлуудыг сүйдэлж, нийтдээ 1.2 сая хүнд ямар нэгэн хэмжээгээр хохирол учруулсан гэсэн тооцоо гарчээ. Барбадос дахь бүх байшин барилгыг нураан сүйдэлж, Пуэрто-Рикогийн ард иргэдийн цахилгааныг тасалж, Британийн Виргинийн арлыг мөн сүйтгэсэн Ирма хар салхи одоо АНУ-ын Флоридагийн Сент-Питерсберг хотыг чиглэж байгаа ажээ. Үүний дараагаар мужийн төв болох Таллахасси рүү чиглэх шинжтэй байгаа юм.

Одоогоор Ирма хар салхи 19 км/цаг-ийн хурдтай байгаа бол ойрын хугацаанд хурдаа улам нэмж, хүч нь нэмэгдэх төлөвтэй байгаа гэнэ. Мэргэжилтнүүдийн таамаглаж буйгаар хар салхины уршгаар 30 сая гаруй хүн ямар нэгэн хэмжээгээр хохирч болзошгүй гэнэ.

Флоридагаас 6.3 сая хүнийг нүүлгэн шилжүүлж, 114 мянган хүн хоргодох байранд ороод байгаа ажээ.

Байгалийн гамшгийг үзэн ядсан Флоридагийн 22 настай иргэн Район Эдвардс фэйсбүүк хуудастаа Ирма хар салхины өөдөөс буудах санаачлага гаргасныг богино хугацаанд 25 мянга орчим хүн дэмжиж, хамтдаа буудахад бэлэн байгаагаа илэрхийлжээ. Энэ явдал тухайн бүс нутгийн Цагдаагийн газрынхныг сандралд оруулж, Ирма хар салхины өөдөөс буудахгүй байхыг хатуу сануулахад хүргэжээ.

Бууны сум хүчтэй хар салхинд буцан эргэж, иргэдийг хөнөөх боломжтойн сацуу хар салхины хүчийг улам нэмэх магадлалтай юм байна.

Ирма хар салхи нь Атлантын далайд ажиглагдсан хамгийн хүчтэй хар салхи гэж мэргэжилтнүүд дүгнээд байгаа юм.

М.Болджин