ПАБЛО ПИКАССОГИЙН ДҮРД АНТОНИО БАНДЕРАС ТОГЛОНО

Испаний нэрт зураач, уран барималч Пабло Пикассогийн тухай "Суутнууд" олон ангит кинонд нэрт жүжигчин Антонио Бандерас гол дүр бүтээхээр болжээ. Урлагт 80 гаруй жил зүтгэж, 50 мянга гаруй уран бүтээл туурвисан Пабло Пикассогийн дүрийг ийнхүү нэрт зураачтай нэг нутагт төрж өссөн Антонио Бандерас амилуулахаар болсон байна.

"Пабло Пикассогийн амьдралын түүх миний сонирхлыг маш их татсаар ирсэн. Бид хоёулаа Малагагаас гаралтай нь бүр ч олзуурхууштай. Тиймээс National Geographic-ийн "Суутнууд" кинонд тоглох болсондоо их баяртай байна. Дэлхийн уран зургийн түүхэн дэх хамгийн шинэлэг, өвөрмөц уран бүтээлчийн талаархи үнэн бодитой түүхийг энэ кино сонирхолтойгоор харуулах болно" гэж Антонио Бандерас өгүүлжээ.

National Geographic өмнө нь Альберт Эйнштейний амьдралаар "Суутнууд" киноныхоо эхний хэсгийг хийсэн нь амжилт олж, телевизийн киноны том наадам "Эмми"-гээс арван төрөлд шагнал гардсан билээ.

Пабло Пикассогийн амьдралаар бүтээх "Суутнууд" киноны зураг авалт энэ намар эхэлж, 2018 онд нээлтээ хийх юм байна.

М.Болджин