"ЛЕСТЕР" 14-ХӨН СЕКУНД ХОЦОРЧЭЭ

Английн "Лестер" 28 настай португал хагас хамгаалагч Адриен Силваг наймааны цонх хаагдах өдөр 22 сая паундаар Португалын "Спортинг"-оос авахаар тохирч, гарын үсэг зуржээ. Гэвч наймааны цонх хаагдах цагаас ердөө 14 секунд хоцорсон тул Олон Улсын Хөлбөмбөгийн Холбоо энэхүү наймааг хүчингүйд тооцсон байна.

"Челси"-г зорьсон Дэнни Дринкуотерийг Адриен Силвагаар орлуулах гэсэн "Үнэгнүүд"-ийн шийдвэр ийнхүү бүтэлгүйтжээ. Хэдийгээр "Лестер" албан ёсны гомдлоо гаргасан ч хүлээж аваагүй гэнэ. Одоо хоёр клуб хөлбөмбөгчийг ирэх өвлийн наймааны цонх хүртэл хаана тоглуулах, хэрхэн шийдэхээ тохиролцох ёстой болсон байна.

Адриен Силва өнгөрсөн улиралд Португалын лигт нийтдээ 36 тоглолтод гарч, зургаан гоол оруулж, дөрвөн гоолын дамжуулалт өгчээ.

М.Болджин