"ИРМА" ХАР САЛХИ ЗАМД ТААРАЛДСАН БҮХНЭЭ СҮЙДЭЛЖ БАЙНА

Карибын тэнгист догшин хар салхи "Ирма" дэгдэж, замд тааралдсан бүхнээ устган сүйтгэж, үнсэн товрог болгосоор байна. 300 км/цагийн хурдтай энэхүү хар салхины улмаас одоогоор зургаан хүн нас бараад байгаа ажээ.

Антигуа, Барбуда, Сен-Мартен, Сент-Бартс зэрэг арлуудыг "Ирма" хар салхи дайран өнгөрөхдөө ургаа модыг үндсээр нь булгалж, тухайн нутаг дэвсгэрийн цахилгааны холболтуудыг сүйтгэжээ.

Хар салхины тавдугаар түвшин буюу хамгийн өндөр түвшинд хүрээд буй "Ирма"-гийн гамшгийн улмаас Францын эзэмшил Сен-Мартен арлын 95 хувь нь сүйдсэн гэж мэдэгдэв. "Энэ бол байгалийн аймшигтай гамшиг. Арлын 95 хувь нь сүйдлээ. Ийм аймшигтай хүчний өмнө хэн ч барьц алдаж, балмагдахаар юм байна" хэмээн Сен-Мартен арлын зөвлөлийн нэгэн гишүүн хэвлэлд мэдээлжээ.

Мөн ойролцоохь арлуудын цахилгаан холболтуудыг сүйдэлсэн тул дэлхий дахины харилцаанаас бүрэн тасалжээ.

Антигуа ба Барбудагийн Ерөнхий сайдын өгүүлснээр бол тус арлын байшингуудын 90 хувь нь сүйдэж, нэг хүн амиа алдсан байна. Тус арлын хохирлын хэмжээг 150 сая ам.доллар гэж тооцсон аж.

М.Болджин