ОРЦНЫ ШИТНЭЭС ГАЛ ГАРЧ, ОРШИН СУУГЧДЫГ САНДАРГАЛАА

Уг үйл явдал өглөө 08:00 цагийн үед болов. Сүхбаатар дүүргийн 1-р хороо 23-р байрны тоот орцны 5 давхарын шитэнд гал гарч, тухайн давхар тэр чигээрээ хоолой хорсгосон харанхуй утаа болсон байсан юм. Шитний хажуугийн хаалганд амьдардаг айлын хувьд хаалга руу нь гал авалцаад нэлээд сандрав.

Оршин суугч иргэний хэлж байгаагаар бол унтаж байхад нь гэнэт л гэр нь утаа болж, хоолой хорсож эхэлсэн байна. Ингээд хаалгаа онгойлгоход хажуугийн шитнээс нь утаа гарч, гал маналзаж байжээ. Сандрахдаа гадагшаа гарч, гудманд явж байгаа хүний утсаар дуудлага өглөө гэсэн юм. Ямартай ч утаа нь улам нэмэгдэж, гал авалцах үед оршин суугчид бүр их сандарч, эхэлсэн бөгөөд шитний хажуугийн хаалганд амьдардаг иргэн хаалга руу нь орох гээд байгаа гал руу ус цацаж, намжаах байдлаар галынхныг хүлээж байв.

Дуудлагын дагуу албаны хүмүүс ирж галыг унтрааж, аюулгүй болгосон юм. Ер нь бол тог цахилгаанаас үүдсэн, хог шатсан гэх мэт ахуйн галын дуудлага онцгой байдлын газарт нэлээн ирдэг. Тухайн гал гарсан орцны иргэдээс галын хор байгаа эсэхийг асуухад бүгд толгой сэгсэрч байв. Харин гэр рүү нь гал орчих вий хэмээн айж, сандарсан иргэний хувьд усаар галыг намжаах оролдлого хийж байлаа. Цахилгаанаас үүдсэн галын ус цацах нь эсрдэлтэй алхам. Галын аюул тохиолдоход иргэд урьдчилан сэргийлэх арга хэмжээг хэрхэн авах, гэр, орон байранд галын аюулгүй байдлын ямар багаж, хэрэгсэл байх ёстой талаар иргэдэд зөвлөмж зөвлөгөө, мэдээлэл байдаггүй нь энэ үйл явдлаас харагдсан юм. Тиймээс холбогдох байгууллагууд нь анхааралдаа авна биз ээ.

Дашрамд дуулгахад СӨХ-үүд нийтийн эзэмшлийн хэсэгт байдаг тоолуур, шийд, дамжуулагч утас зэргүүдийн ашиглалтын шаардлагыг хангуулж, тогтмол засвар үйлчилгээ хийж байх ёстой байдаг аж.

Б.Ирээдүй