АНЖЕЛИНА ЖОЛИ ОДОО БИ ӨРХ ТОЛГОЙЛСОН ЭХ ТУЛ АЖЛАА ХИЙХГҮЙ БОЛОХГҮЙ

Холливудын нэрт жүжигчин Анжелина Жоли Telluride Film Festival кино наадамд өөрийн найруулсан First They Killed My Father: A Daughter of Cambodia Remembers кинотойгоо очлоо. Тус кинонд Камбожийн хүний эрхийн төлөө тэмцэгч, зохиолч эмэгтэй Лун Аны амьдралын бодит түүхийг өгүүлдэг ажээ.

42 настай жүжигчин сүүлийн нэг жилийг даван туулахад маш хүнд байснаа мөн дурьджээ. Брэд Питтээс салж, хүүхдүүдээ өсгөх болсон Анжелина Жоли аль болох инээмсэглэхийг хүсдэг ч гэсэн сэтгэлзүйн хувьд хүнд цохилтод орсоноо ний нуугүй ярьсан байна.

"Заримдаа ч би зүгээр л үргэлжлүүлээд амьдарья л гэж боддог. Заримдаа амьдралаа бүрэн хяналтдаа байлгаж байгаа юм шиг санагдавч, заримдаа мөн тэр хяналтаа алдчихсан л явж байдаг. Ганцаараа байх муухай юм. Надад таалагдахгүй байна. Би ийм болохыг хүсээгүй. Ганцаараа байлаа гээд сайхан юм алга. Их хүнд байна.

Сэтгэлзүйн хувьд их хэцүү жил өнгөрлөө. Гэтэл бас бие өвдөнө. Эрүүл мэнддээ байнга анхаарахгүй бол болохгүй болсон. Нэг хүчтэй цохилтод орчихсон мэт санагдаж байгаа. Намайг уурлаж бухимдаж адгаад байхаар хүүхдүүд маань ч амьдралын аз жаргал, инээд хөөрийг бага мэдрээд эхлэх шиг. Гэлээ ч би аль болох л инээмсэглэхийг хичээдэг. Энэ бол аз жаргал ерөөсөн мэндчилгээ ирдэгтэй л адил. Гэвч амьдрал дээр инээх зүйл бага харагдана.

Одоо би өрх толгойлсон эх. Тиймээс ажлаа хийхгүй болохгүй. Хүүхдүүд минь том болоод эргээд ээждээ тусална гэж би найдаж байгаа" хэмээн Анжелина Жоли өгүүлжээ.

М.Болджин