29 ГРУШИК ШАР АЙРГИЙГ НЭГ ДОР ЗӨӨЖ, ДЭЛХИЙН ДЭЭД АМЖИЛТ ТОГТООВ

Германы Бавари мужийн зөөгч Оливер Штрюмпфель 29 грушик шар айргийг 40 метрийн зайд нэг дор зөөн, дэлхийн дээд амжилтыг тогтоолоо. Тэрбээр эхлээд 31 грушик шар айргийг зөөхөөр замд гарсан ч хоёр нь газар унасан ажээ. Гэвч хүргэх ёстой ширээндээ 29 грушикийг аваачиж чадсан нь дэлхийн дээд амжилт болсон юм.

"Эхэндээ би 27 грушик шар айраг зөөсөн. Энэ нь өөртөө итгэх итгэлээ сэргээх гэсэн арга байлаа. Харин дараа нь 30 гаруйг зөөхийг хичээсэн юм" гэж Оливер Штрюмпфель өгүүлжээ.

Оливер ийм амжилтад хүрэхийн тулд өнгөрсөн хоёрдугаар сараас эхлэн долоо хоногт 3-4 удаа бэлтгэлийн зааланд шар айраг зөөх бэлтгэл хийсэн гэнэ. "Энэ 40 метрийг амжилттай туулахын тулд би 200 гаруй цагийн бэлтгэл хийсэн" гэж зөөгч мэдэгдсэн байна.

М.Болджин