ЯПОНЫ ГҮНЖ ЖИРИЙН ЗАЛУУТАЙ СҮЙ ТАВЬЖ, ХААНЫ ГЭР БҮЛЭЭС ХАСАГДАХААР БОЛЛОО

Японы гүнж Мако их сургуулийн нэг ангийн залуу Кеи Комуратай сүй тавьсан талаар Эзэн хааны гэр бүлээс албан ёсоор зарлалаа. Мако гүнж нь Японы Эзэн хааны ууган хүү Акишиногийн том охин юм.

Японд Хаан ширээг зөвхөн эрэгтэй хүн залгамжлах эрхтэй байдаг. Харин Мако гүнж жирийн иргэнтэй гэрлэх болсон тул хуримаа хийснийхээ дараагаар Хааны гэр бүлээсээ хасагдаж, нөхөртэйгээ адил жирийн иргэн болох юм байна. Язгууртны удмын хүнтэй гэрлээгүй бол Японы Хааны гэр бүлээс хасагддаг журам үйлчилдэг.

Мако гүнжид зөвхөн нэг удаа ихээхэн хэмжээний хөрөнгө тасалж өгөөд, цаашид гүнжийн хэргэмээ алдсан тул тусгай хангамж олгохгүй гэнэ. Гүнжид олгох хөрөнгийн хэмжээг Японы Эзэн хаан болон Ерөнхий сайд хамтран зөвшилцөж шийднэ.

Сүй тавьсан тухай зарласан хэвлэлийн бага хурал дээр Мако гүнж "Эхлээд түүний инээмсэглэл надад яг л нар шиг хурц санагдсан. Харин дараа нь өгөөмөр сайхан сэтгэлтэй, эрс шийдэмгий зантай, хөдөлмөрч хүн гэдгийг мэдэрсэн" хэмээн мэдэгджээ.

Мако гүнж өнгөрсөн долдугаар сард сүй тавихаар товлогдоод байсан ч Кюүшюү арал үерт автсан тул хойшлуулахад хүрсэн юм. Тэд хуримаа ирэх жил хийх ажээ.

М.Болджин