Н.ТҮВШИНБАЯР: МАГАДГҮЙ СҮҮЛЧИЙН ДАШТ-ЭЭСЭЭ ХҮССЭН МЕДАЛИА ХҮРТЛЭЭ

Унгарын Будапешт хотноо болж буй жүдо бөхийн ДАШТ-ий үнэмлэхүй жинд олимпийн аварга, олимпийн мөнгөн медальт, Монголын домогт бөх Найдангийн Түвшинбаяр хүрэл медаль хүртэж, элэг нэгтнүүдийнхээ цөсийг хөөргөлөө.

-100 кг-ын жинд олон жил барилдаж, монголчуудаа баярлуулсан аварга маань энэ удаад +100 кг-ын жинд буюу өөрөөсөө тохой өндөр, хэдэн арван кг-аар хүнд жинтэй өрсөлдөгчидтэй тулж, улмаар ийнхүү дэлхийн хүрэл медалийг хүртэж чадлаа.

"Миний хувьд олон жил дэлхийн аваргаас медаль авах гэж хүсч мөрөөдөж, оролцож байсан. Өмнө нь хоёр удаа тавдугаар байрт, нэг удаа долдугаар байрт орж байсан. Маш их хүсч байсан медалиа магадгүй сүүлчийн ДАШТ-ээсээ хүртлээ" хэмээн медаль хүртсэнийхээ дараагаар Н.Түвшинбаяр өгүүлжээ.

Унгарын татамиас манай жүдочид одоогоор нэг алт, нэг мөнгө, дөрвөн хүрэл медаль хүртэж, багийн дүнгээр Япон, Францын дараагаар гуравдугаар байрт бичигдэж байна.

М.Болджин