БАГА НАСНЫ ХҮҮХДИЙГ ДЭЭРЭМДЭХ ҮЙЛДЛИЙГ КАМЕРЫН ТУСЛАМЖТАЙГААР ШУУРХАЙ ТАСЛАН ЗОГСООЖЭЭ

Сүхбаатар дүүргийн 4-р хороон 20-р байрны 2-р орц руу өчигдөр 12:52 цагийн үед сэжиг бүхий гурван залуу нэг хүүхдийг дагуулан орсоныг телекамерын хяналтын цагдаа илрүүлэн эргүүлийн үүрэг гүйцэтгэж байсан алба хаагчдад мэдээллийг шуурхай дамжуулсан байна. Ийнхүү цагдаагийн алба хаагчид газар дээр нь шуурхай ажиллаж, дээрмийн үйлдлийг таслан зогсоожээ. БЗД-ийн 27-р хороонд суух 15 настай эрэгтэй М, СХД-ийн харъяат 18 настай эрэгтэй Н, БГД-ийн харъяат эрэгтэй 20 настай Т нар нь БГД-ийн 3-р хороонд оршин суух 15 настай эрэгтэй Д-г айлган сүрдүүлж "iPhone-4" гар утасыг дээрэмдсэн байна. Хэргийг СБД-ийн цагдаагийн нэгдүгээр хэлтэст шалгаж байгаа юм.

Мөн тус айрны 4-р орцонд сэжиг бүхий хоёр залуу нэг хүүхдийг дагуулан орсныг камераар илрүүлэн, эргүүлийн үүрэг гүйцэтгэж байсан албан хаагчдад мэдээллэсэн байна. Мэдээллийн дагуу шалгахад СБД-ийн 11-р хороонд оршин суух 14 настай эрэгтэй Ц-г 17 настай эрэгтэй Б, 14 настай эрэгтэй С нар айлган сүрдүүлж дээрэмдсэн байна. Хэргийг мөн цагдаагийн хэлтэст шалгаж байгаа аж.

Ямартай ч телекамерын хяналтын бүс үүсгэснээр бага насны хүүхдүүдийг орцонд дээрэмдэх, айлган сүрдүүлэх үйл ажиллагааг түргэн илрүүлж, шуурхай арга хэмжээ авах нөхцөл бүрджээ.

Б.Ирээдүй