Д.СУМЬЯА ДЭЛХИЙН АВАРГА БОЛЖ, Г.ОДБАЯР ХҮРЭЛ МЕДАЛЬ ХҮРТЛЭЭ

Унгарын Будапешт хотноо болж буй жүдо бөхийн Дэлхийн аварга шалгаруулах тэмцээнд манай тамирчид одтой, хүчтэй барилдаж олон медаль хүртсээр байна.

Өчигдөр эмэгтэйчүүдийн 57 кг-ын жинд олимпийн мөнгөн медальт, дэлхийн хүрэл медальт Доржсүрэнгийн Сумьяа татами дээр гарч, аваргын төлөөх барилдаанд Японы Цукаса Ёшидаг бүтэн 14 минут барилдсаны эцэст вазаари үнэлгээгээр ялж, дэлхийн аварга боллоо. Ийнхүү дэлхийн аваргын татами дээр Монгол Улсынхаа төрийн дууллыг эгшиглүүлсэн хоёр дахь тамирчин нь Д.Сумьяа болов.

Эрэгтэйчүүдийн 73 кг-ын жинд Ганбаатарын Одбаяр хүрэл медалийн төлөөх барилдаанд Азербайжаны Хидьят Хейдаровыг ялж, монгол жүдочдынхоо медалийн буухиаг үргэлжлүүлж, дэлхийн медальтны тоог нэгээр нэмлээ.

Ийнхүү жүдо бөхийн ДАШТ-ий эхний гурван хоногийн дараагаар манай баг тамирч нэг алт, нэг мөнгө, хоёр хүрэл медальтайгаар нийт 128 улс оролцож буй тэмцээний аман хүзүүнд бичигдэж байна. Та бүхэн Д.Сумьяагийн дэлхийн аварга болсон агшнуудын дороос харна уу.

Эмэгтэй 57 кг.

• 1.Доржсүрэнгийн СУМЬЯА /Монгол/
• 2.Цукаса Ёшида /Япон/
• 3.Элен Ресево /Франц/
• 3.Никода Смайт-Дэвис /Их Британи/

Эрэгтэй 73 кг.

• 1.Соичи Хашимото /Япон/
• 2.Рустам Оружов /Азербайжан/
• 3.Ганбаатарын ОДБАЯР /Монгол/
• 3.Ан Чан Рим /БНСУ/

М.Болджин