ВЕНЕЦИЙН КИНО НААДАМД АРАНОФСКИ, КИТАНО, КЛУНИГИЙН БҮТЭЭЛҮҮД ОРОЛЦОНО

Өнөөдөр Венецийн кино наадам нээлтээ хийж байна. 74 дэх удаагаа зохиогдож буй тус наадамд энэ оны "Оскар"-ын төлөө өрсөлдөнө гэж мэргэжилтнүүдийн дүгнэж буй хэд хэдэн бүтээл оролцож буй тул олны анхаарлыг гойд татна.

Кино наадмыг Александр Пэйний Downsizing инээдмийн кино нээх юм. Тус киноны гол дүрд Мэтт Дэймон тогложээ. Мэтт Дэймон үүнээс гадна Жорж Клунигийн найруулсан Suburbicon кинонд мөн тоглосон нь Венецийн дэлгэцнээ гарна. Тус киноны зохиол дээр ах дүү Коэн Клунитай хамтран ажилласан.

"Оскар" хүртэх магадлалтай гэгдэж буй өөр нэг кино бол Даррен Аронофскигийн бүтээл, Хавьер Бардем, Женнифер Лоуренс нарын гол дүрийг нь амилуулсан "Mother" юм.

Үүнээс гадна мексик найруулагч Гилльермо дель Торогийн "The Shape of Water", Жон Вугийн "Manhunt", Мартин Макдонахын "Three Billboards Outside Ebbing, Missouri,", Абделатиф Кешишийн 'Mektoub, My Love', Хироказу Кора-Эдагийн "The Third Murder" зэрэг сонирхол татах олон бүтээл өрсөлдөх гэнэ.

Мөн Японы нэрт найруулагч Такеши Китано якуза нарын тэмцлийн тухай "Outrage Coda" киногоо толилуулна.

Венецийн кино наадам нь кино урлагийн салбартаа нэр төрөөрөө Каннын кино наадмын дараагаар ордог. Хэдийгээр Каннд бизнес түлхүү "үнэртдэг" бол Венецид урлаг илүү ханхалдаг гэж мэргэжилтнүүд дүгнэдэг. Харин энэ удаад олон алдартай найруулагч, жүжигчид цугласан "бизнес" ханхалсан наадам болох төлөвтэй гэнэ.

М.Болджин