ҮЕРТ УРСАЖ БАЙСАН ХҮҮГ АВАРСАН ТАВАН ИРГЭНИЙГ ШАГНАЖЭЭ

Энэ сарын 14-нд Орхон аймагт орсон хүчтэй аадар бороо, мөндөрийн улмаас үерийн усанд урсаж байсан 15 настай н.Мандуул хүүг аварсан иргэдийг "Хүндэт тэмдэг", мөнгөн шагналаар тус тус шагнасан байна.

Тодруулбал, Шанд багийн иргэн Э.Цагаанхүү, Эрдэнэ багийн иргэн Ж.Баатар, Д.Амарсайхан, Даваат багийн иргэн Ш.Гомбо, Яргуйт багийн иргэн С.Отгон-Эрдэнэ нарыг Орхон аймгийн "Хүндэт тэмдэг", мөнгөн шагналаар шагнасан юм. Тухайн өдөр Яргуйт багт оршин суудаг, одоогоор Дархан-Уул аймгийн политерникийн коллежийн оюутан С.Отгон-Эрдэнэ үерт урсаж байсан иргэнийг анх олж харж уснаас гаргаж авах гэж оролдсон боловч ганцаараа хүч дутаад байх үед ИТХ-ын төлөөлөгч, Шанд багийн иргэн Э.Цагаанхүү багийнхаа нөхцөл байдалтай танилцаж явж байгаад уг тусламж дуудахыг сонсоод очжээ. Ингээд мөн тэнд явж байсан хүмүүс нэмэгдэн ирснээр Ж.Баатарын машинаас олс авч ирж 15 настай н.Мандуул хүүг уснаас аварсан байна.