ХЬЮСТОНЫГ "ХАРВИ" ХАР САЛХИ ЧИЧРҮҮЛЖ БАЙНА

АНУ-ын Техас мужийн хамгийн том хот Хьюстоныг "Харви" хар салхи живүүлэх тун дөхөөд байна. Хьюстон хотод байгалийн онц ноцтой гамшгийн байдал зарлажээ. "Харви" хар салхи Хьюстоныг дайраад өнгөрөх бус энэ долоо хоногийн дунд хүртэл тэндээ "эзэгнэсээр" байх гэнэ.

Хьюстон хотын дарга Сильвестр Тернерийн мэдэгдлээс үзвэл 2000 гаруй хүн үерийн аюулд автаж, тусламж гуйн залгасан аж. Одоогоор Хьюстоны 70 мянган айл өрх гэрэл цахилгаангүй болжээ. Байгалийн онц ноцтой гамшиг нүүрлэсэн Хьюстон хот руу АНУ-ын Ерөнхийлөгч Дональд Трамп очихоор болж буй юм байна.

2005 онд Шинэ Орлеанд дэгдсэн "Катрина" хар салхиас хойш сүүлийн 12 жилийн хугацаанд Америкт "Харви" шиг хүчтэй хар салхи үзэгдээгүй гэнэ. Одоогоор "Харви" хоёр хүний амийг авч оджээ. Мөн 30 гаруй хүн ор сураггүй алга болоод байгаа гэнэ.

2005 онд Шинэ Орлеанд дэгдсэн "Катрина" хар салхи 1383 хүний аминд хүрсэн бөгөөд 4000 гаруй хүн одоо хүртэл сураггүй алга болсонд тооцогдсоор байгаа юм.

М.Болджин