СУДАР НОМД НЭВЧСЭН РОБОТ ЛАМ НАРЫН АЖЛЫГ БУЛААХ УУ?

Буддын шашины урт судар номыг алдаагүй уншдаг роботыг Японы Nissei Eco компани үйлдвэрлэн гаргажээ. Судар номд нэвчсэн энэ роботыг Peppeр гэдэг. Pepper тарни номыг нь түгдрэлгүй уншихаас гадна өргөл барьц авдаггүй тул борлуулалт сайтай байна гэж тооцсон гэнэ.

Японд одоогоор оршуулгын зардалд дунджаар 20 мянган паунд зарцуулдгаас 1700 паунд орчим нь ном уншуулахад зориулдаг аж. Гэтэл Pepper –ийн үнэ 1350 паунд тул иргэд сонгож авах магадлал их ажээ.

Pepper роботыг анх 2014 онд худалдаанд гаргасан байна. Энэ робот нь харилцагч хүний сэтгэл хөдлөл, үйлдлийг мэдрэх чадвартай ухаалаг бүтээл гэнэ. Тухайлбал, хүний нүүр царайны хувирал, сэтгэл санааны байдалд тохируулан дууны өнгө аясаа өөрчлөх чадвартай. Мөн ойр орчмын нөхцөл байдлыг камер, мэдрэгчийн тусламжтайгаар мэдэрдэг.

Харин энэ удаад Pepper-т буддын шашины ном судар тусгайлан суулгаж, ийнхүү борлуулалтад гаргажээ.

М.Болджин