РОНАЛДО ЕВРОПЫН ШИЛДГЭЭР ТОДОРЧ, АВАРГУУДЫН ЛИГИЙН СУГАЛАА ЯВАГДЛАА

Өчигдөр Монакод Европын Хөлбөмбөгийн Холбооноос Аваргуудын лигийн хэсгийн сугалааг явуулсны зэрэгцээ мөн тивийнхээ шилдэг хөлбөмбөгчийг тодруулан зарлалаа.

Өнгөрсөн жил өнгөрсөн улиралд Испанийн "Реал Мадрид"-тай Аваргуудын лигийн аваргын цомыг гардсан Криштиано Роналдо тивийнхээ шилдэг хөлбөмбөгчөөр нэрлэгдэж, шагналаа гардлаа. Тэрбээр ийнхүү 2014, 2016, 2017 онд тус нэр хүндтэй шагналыг гардаж байна.

Европын шилдэг эмэгтэй хөлбөмбөгчөөр хэдхэн хоногийн өмнө Голландын шигшээтэйгээ Европын аварга болсон Лике Мартенс тодорлоо.

Энэ жилээс эхлэн ЕХХ-ноос Аваргуудын лигийн шилдэг хаалгач, хамгаалагч, хагас хамгаалагч, довтлогчдыг тусгайлан тодруулдаг боллоо. Шилдэг хаалгачаар Италийн "Ювентус"-ын домогт Жанлуижи Буффон, шилдэг хамгаалагчаар Испанийн "Реал Мадрид"-ын ахлагч Серхио Рамос, шилдэг хагас хамгаалагчаар Испанийн "Реал Мадрид"-ын тархи болсон хорват залуу Лука Модрич, шилдэг довтлогчоор өнгөрсөн улирлын Аваргуудын лигийн шийдвэрлэх тоглолтуудад гоолын мөндөр буулгасан Криштиано Роналдо нар нэрлэгдлээ.

Үүний зэрэгцээ Аваргуудын лигийн хэсгийн сугалаа явагдлаа. Хөлбөмбөгийн ертөнцөд "Үхлийн хэсэг" гэх хэллэг дэлгэрсэн байдаг. Энэ удаад Н хэсэгт "Реал Мадрид", "Боруссиа Дортмунд", "Тоттенхэм", АПОЭЛ гэсэн дөрвөн баг орсон нь Үхлийн хэсэгт тооцогдож байна.

32 баг найман хэсэгт хуваагдан өрсөлдөх бөгөөд нэг баг хэсэгтээ зургаан тоглолт хийнэ. Хэсэгтээ эхний хоёр байр эзэлсэн баг дараагийн шатанд шалгарч, харин гуравдугаар байр эзэлсэн баг Европа лигийн дараагийн шатанд орох юм. Аваргуудын лигийн хэсгийн эхний тоглолт есдүгээр сарын 12-нд болно.

М.Болджин