​ЭМЭЭДЭЭ ТУСЛАХААР ХҮЙТЭН ӨВӨЛ 8 КИЛОМЕТР АЛХСАН 4 НАСТАЙ ОХИНЫГ БАЙРААР ШАГНАВ

ОХУ-ын Тува улсын алс бөглүү орших нэгэн суурингаас хүнд өвдсөн эмээдээ тусалж, хүмүүст хэл дуулгахаар дөрвөн настай охин Саглана хүйтэн өвөл Тайгаар найман километр явж, ойролцоохь тосгонд очсон явдал гарсан. Өнгөрсөн хоёрдугаар сарын 8-нд болсон энэхүү үйл явдал ОХУ-ын хэвлэл мэдээллийн хэрэгслүүд болон олон нийтийн сүлжээгээр олонтаа яригдаж, сайхан сэтгэлт эрэлхэг бяцхан охиныг олон нийт бахдан өхөөрдсөн юм. Харин түүний ээжийг буруутгах өнгө аяс байсан. Хүүхэд байтугай том хүн хүрэхийн аргагүй хол газар бяцхан охин болон өндөр настай ээжийгээ орхин хот бараадсаныг нь хүнлэг бус үйлдэл ч гэцгээжээ.

Нэг хэсэгтээ охиныг хүүхдийн амралт сувиллын газарт байлгасан юм. Бүх бие нь хүйт дааж, хөлдөх шахсан ч гэсэн охины аминд халгүй гэж эмч нар тухай үед мэдэгдэж байв.

Тэгвэл ОХУ-ын Ерөнхийлөгчийн дэргэдэх Хүүхдийн асуудал эрхэлсэн газраас Саглана охины сайхан сэтгэл, эрэлхэг үйлсийг үнэлж гэр бүлийнхэнд нь байр өгчээ. Харин түүний ээжийн тогооч мэргэжлээр сурах төлбөрийг төрөөс даахаар болсон байна.

М.Болджин