УИХ-ЫН ГИШҮҮН Б.ГАНТУЛГЫН ХЭРГИЙГ ШАЛГАХЫГ УЕПГ-ААС ЦАГДААГИЙН ГАЗАРТ ДААЛГАСАН БАЙНА

Улсын Их Хурлын гишүүн Д.Гантулгад холбогдох эрүүгийн хэрэг үүсгэхээс татгалзаж шийдвэрлэсэн материалыг иргэн Ч.Наранзаяагийн гомдлоор УЕПГ-аас хянаад эрүүгийн хэрэг үүсгэхээс татгалзсан прокурорын шийдвэрийг хүчингүй болгосон байна. Түүнчлэн хэрэг бүртгэлтийн хэрэг нээн, мөрдөн шалгах ажиллагаа явуулахыг Баянзүрх дүүрэг дэх Цагдаагийн нэгдүгээр хэлтэст даалгаж, хэргийг хүргүүлжээ.

Цагдаагийн байгууллага мөрдөн байцаалтын ажиллагааг явуулахдаа УИХ-ын гишүүн Д.Гантулгыг албадан баривчилж, хүчээр мэдүүлэг авах болоод шүүхээс ял оноох эрхгүй. Хэрэв түүнийг саатуулах болбол УИХ-ын даргад цагдаа, прокурор, шүүхийн байгууллагаас албан хүсэлт гаргах ёстой бөгөөд УИХ-ын Ёс зүй хорооноос Д.Гантулга гишүүний халдашгүй бүрэн эрхийг түдгэлзүүлэх эсэхийг шийдэх учиртай.

Ямартай ч Цагдаагийн байгууллага түүнд эрүүгийн хэрэг үүсгэн шалгах бол УИХ-ын Ёс зүйн хорооноос бүрэн эрхийг түр болон бүр түдгэлзүүлсэн тохиолдолд Д.Гантулга гишүүнийг албадан баривчлах, ял оноох боломжтой болно.