​ШВЕД СЭТГҮҮЛЧ БҮСГҮЙН ЦОГЦОС ТОЛГОЙ, ГАР ХӨЛГҮЙ БАЙЖЭЭ

Хувь хүний зохиосон бүтээсэн дэлхийн хамгийн том шумбагч онгоцын талаар нийтлэл бичихийг зорьсон швед сэтгүүлч бүсгүй Ким Уоллын цогцсыг гурван хоногийн өмнө олсон тухай мэдээлсэн. Тэгвэл цогцос толгой, гар, хөлгүй байсан гэнэ.

БНХАУ, АНУ, Их Британийн хэд хэдэн хэвлэлтэй гэрээтэй ажилладаг сэтгүүлч бүсгүй Ким Уолл түрүүн өгүүлсэнчлэн хамгийн том шумбагч онгоцыг бүтээсэн Петер Мадсений талаар нийтлэл бичихээр очсоноосоо хойш сураггүй болсон юм. Харин Петер Мадсений Nautilus шумбагч онгоц өнгөрсөн наймдугаар сарын 11-нд Данийн нийслэл Копенгагений ойролцоо живсэн. Петер Мадсен эхэндээ "Би түүнийг Копенгагений ойролцоо буулгасан" гэж мэдүүлэг өгсөн бол дараа нь мэдүүлгээ өөрчилж "Золгүй тохиолдлоор тэр нас барсан болохоор би тэнгист оршуулсан" гэжээ.

"Цогцсоос бид ДНК-гийн шинжилгээ авахад Ким Уоллынх мөн болох нь тогтоогдсон. Мөн шумбагч онгоц дээрх цусны толбо ч түүнийх гэдэг нь тогтоогдсон. Бид урьдын адил олон нийтээс энэ хэрэг дээр туслалцаа хүссэн хэвээр. Бид Ким Уоллын биеийн бусад хэсгүүдийг олохыг зорьж байна" хэмээн Копенгагений цагдаагийн ажилтан Йенс Миллер мэдэгджээ.

Одоогоор шинжээчид үхлийн шалтгааныг тогтоогоогүй байгаа аж. Харин цагдаагийнхан Мадсений эхний хохирогч нь Уолл биш байж магадгүй гэж таамаглаж буй гэнэ. 1987 онд мөн Копенгагений ойролцоохь тэнгисээс толгой, үегүй эмэгтэй хүний цогцос олдсон ч хэрэгтэн илрээгүй юм байна.

Петер Мадсен нь зохион бүтээгч, инженер мэргэжилтэй, 2001-2008 оны хугацаанд гурван шумбагч онгоц бүтээсэн. Одоо сансрын хөөрөх төхөөрөмжийн төсөл дээр ажиллаж байгаа.

Nautilus шумбагч нь 17.76 метр урттай, 40 тонн жинтэй. Найман зорчигчийн даацтай гэнэ. 2008 онд тус шумбагчийг хувь хүний бүтээсэн хамгийн том шумбагч гэж дэлхийд зарласан юм.

М.Болджин