​Д.ХАЯНХЯРВАА: 60 ТЭРБУМЫН АСУУДАЛД ХОЛБОГДСОН ХҮМҮҮСИЙГ ӨМГӨӨЛЖ ХААЦАЙЛААД БАЙГАА ЮМ АЛГА

МАН-ын нэр хүндийг "шаварт" хутгаад байгаа 60 тэрбумын асуудлаар тус намын гишүүд байр сууриа илэрхийлсээр байгаа билээ. Гэхдээ залуучууд нь голдуу энэ асуудлыг эсэргүүцэн, удирдлагуудаа буруутгах хандлага нэлээд ажиглагдаж байгаа юм. Харин ахмад гишүүдийн хувьд тэр болгон ам нээх нь ховор. Тэгвэл саяхан УИХ дахь МАН-ын бүлгийн дарга Хаянхярваа энэ асуудлаар өөрийн байр суурийг илэрхийлсэн байна. Тэрбээр "60 тэрбумтай холбогдсон асуудлаар өмнө нь хууль хяналтын байгууллага шалгаад дүгнэлтээ гаргасан. Одоо ч мөн шалгаж байгаа юм билээ. Түүнээс биш 60 тэрбумын асуудалд холбогдсон хүмүүсийг өмгөөлж хаацайлаад байгаа юм алга.

Харин нэг зүйлийг тодотгож хэлье.

Ерөнхийлөгчийн сонгуулийн өмнө намын дарга, Ц.Сандуй бид гурав уулзахад Сандуй "60 тэрбумын асуудалтай холбоотойгоор би Нийслэлийн намын дарга, НИТХ-ын даргын ажлаа өгчихье" гээд хууль хяналтын байгууллагаар явж үнэн мөнийг нь тогтоолгоё гэж ярилцаад Сандуй тэр өдрөө 11 цагт хэвлэлийн хурал хийхээр болсон.

Гэтэл хэвлэлийн хурлаа хийгээгүй. Сүүлд нь юу болов гэтэл сонгуулийн ерөнхий менежер, намын ерөнхий нарийн бичгийн дарга Д.Амарбаясгалан "битгий өг" гэж хэлсэн гэж байсан. Эртээд Д.Амарбаясгалангаас энэ талаар асуусан. Сонгуулиас өмнөх байр суурь, сонгуулийн дараах байр суурь ийм байж болох уу. Сонгуулийн дараа намын генсек рүү янз бүрийн дайралт давшилт ирсэн байх. Энэ бол гэм биш зан. Ялагдлын дараах хүмүүсийн араншин. Гэм бурууг өөртөө хүлээхээс бултацгаах гэж ядсан арга " хэмээн ярьжээ.

Б.Ирээдүй