ЭЛВИС ПРЕСЛИГ 40 ЖИЛИЙН ДАРАА ЭХНЭР НЬ УЯРАН ДУРСАВ

Рок-н-роллын хаан Элвис Пресли ертөнцийн мөнх бусыг үзүүлснээс хойш яг 40 жил өнгөрч байна. Түүний эхнэр Присцилла Преслигийн гэрийн ойролцоо энэ гунигт өдөр 50 мянган үнэнч фэн нь цуглаж, хүндэтгэл үзүүлж, зул асаасан юм. Харин 72 настай Присцилла Пресли нөхрөө энэ өдөр дурсан томоохон ярилцлага өгснийг товчлон хөрвүүлэн хүргэе.

"Тэр тухайн үеийн нэг хэвшмэл байдлыг эвдэж, бүх талаараа онцгойрч гарч ирсэн юм. Зөвхөн дуулах, хөгжимдөхдөө ч бус хувцаслалт, сайхан төрхөөрөө тэр бүхнийг мартахад хүргэж байлаа.

Гэхдээ бүх зүйл түүний гайхалтай хоолойноос эхэлдэг байв. Дуу хоолойнд нь хүмүүс шууд дурлана. Дуулаад эхлэхэд нь цугласан олон дотроо "Надад л зориулж дуулж байна" хөөрч баярлана. Би ч гэсэн концертийг нь үзэхээр очихдоо анх яг ингэж мэдэрсэн. Ганцхан надад зориулж буй юм шиг хөөрч, орчин тойрноо мартчихсан.

Түүнд бүгд хайртай. Одоо ч хайртай хэвээрээ... Тэр өглөө сэрэхдээ ч гайхалтай сайхан харагддагсан. Заримдаа би ширтээд л байна, ширтээд л байна. Мөн ч их ширтдэг байсан даа...Тэр хийсэн бүх зүйлдээ төгсөн сайн байлаа.

1977 оны наймдугаар сарын тэр Элвисийн өөд болсон өдрийг би бодохгүй байж чаддаггүй юм. Гэхдээ одоо ч гэсэн олон мянган хүн түүний минь хийсэн бүтээсэн сайн сайхан бүхнийг санаж, дурсаж яваа. Түүнийг минь дурсах гэж олон хүн энд ирдэг.

Нас барснаас нь хойш яг 40 жил болоход хэн ч мартаагүй. Сая бүр 50 мянган хүн ирж, хүндэтгэл үзүүлж, бид хамтдаа дурссан. Бидний ганц охин Лиза Мари Пресли ч ирсэн. Охин маань хоёр их охиноо дагуулж ирсэн юм.

40 жилийн дараа ч хүмүүс бүр олуулаа болж ирж байгаа. Хэрвээ тэр минь байсан бол гудамжинд цугласан тэр олон хүнийг хараад, өөрийг нь одоо ч хайрлаж, үгүйлж байгааг харах байлаа..." хэмээн Присцилла Элвис дурсан ярьжээ.

Домогт дуучны үхлийн тухайд олон талын яриа бий. Зарим нь одоо ч түүнийг амьд гэдэгт итгэсээр байгаа.

Гэхдээ албан ёсоор бол 1977 оны наймдугаар сарын 16-нд эмийн тун хэтрүүлэн хэрэглэсний улмаас амьсгал хураасанд тооцогддог. Элвис Пресли 1970 оноос хойш ачааллаа бүрэн дааж ажиллахын тулд олон цагийн турш нойр хүргэхгүй, эрч хүчтэй байлгах эмийг бага багаар хэрэглэх болсон гэдэг. Аажимдаа эмгүйгээр байж чадахаа больжээ.

Таалал төгссөн өдөр болсон явдлын талаар хэвлэлээр дурьдахдаа "Элвис тэр өдөр шүдний эмчийнхээс их оройтож гэртээ ирсэн. Мөдхөн хийх концерт болон өөрийнх нь хувийн амьдрал, эмийн хамааралтай болсон талаар ном бичиж гаргасан найзаа гэж явсан хүмүүсийнхээ талаар ихэд эмзэглэн ярьсаар байжээ. Ингээд зуршил ёсоороо өглөө унтахаар эм уусан. Гэвч янз бүрийн бодол түүнийг амраахгүй байсан тул эмийн тунг нэмж хэрэглэсэн..." хэмээн тэмдэглэсэн байдаг.

Рок-н-роллын хаан Элвис Пресли ид гялалзах 42-хон насандаа ертөнцөөс одсоноос хойш 40 жил өнгөрсөн ч хэдэн сая хүний сэтгэлийг эзэмдэж, сэргээсэн хэвээр байгаа билээ.

М.Болджин