​МАН-ЫН БАГА ХУРАЛ ИРЭХ САРЫН 20-НД БОЛНО

МАН-ын Удирдах зөвлөл өчигдөр үдээс хойш хуралдсан. Нийтдээ 31 гишүүн хуралд оролцох ёстойгоос 20 гаруй гишүүн иржээ. Тус хурлыг хаалттай хийж, хэвлэл мэдээллийн ажилтнуудыг тусгаар тогтнолын ордон руу нэвтэрхийг хориглосон. Хэлэлцэх асуудал нь нууц бөгөөд ширүүн учраас МАН хаалттай хуралдсан бизээ. Хуралдааны эхэнд Монгол Улсын Шадар Сайд У.Хүрэлсүх найруулагч Б.Баатартай утсаар ярьсан бичлэгийнхээ тухай тайлбар өгөөд дараа нь ажлаа өгөхөө мэдэгдээд хурлыг орхиж гарчээ. НИТХ-ын дарга Ц.Сандуйг Удирдах зөвлөлийн нэр бүхий гишүүд огцруулах асуудлыг хөндсөн байна. Харин Ц.Сандуйгийн хувьд огцрохгүй, миний найз Ганбаатар ч мөн адил намын төлөө зүтгэж байгаад өнөөдөр хоригдож байна. Тиймээс би огцрохгүй гэж гүрийжээ. Харин Удирдах зөвлөлийн гишүүдийн шийдвэрээс Ц.Сандуйгийн холбогдсон 60 тэрбум төгрөгийн асуудал хууль хяналтын байгууллагын шийдвэр гарсны дараа эргэж ярихаар тогтсон аж. Өчигдөрийн хуралдаанаас МАН-ын бага хурлыг ирэх 9-р сарын 20-нд хуралдахаар товлосон байна.